ORANJESTAD – Si mester a warda pa e ley di FASE keda cla y pasa, hende lo a muri di hamber. Asina minister Glenbert Croes a bisa diahuebs atardi, durante un conferencia di prensa, den un intento pa refuta mayoria di e critica exponi pa Raad van Advies recientemente den un rapport riba FASE. E rapport tabata basta critico riba e proyecto aki, cu mester a genera placa pa un grupo grandi di hende cu a keda ‘desampara’ ora cu e pandemia a toca porta di Aruba dos aña y mei pasa. Mientrastanto, segun e minister, e suma di 79 miyon florin a keda ‘reparti’ entre 18 mil persona durante e pandemia. Un suma di algo mas di 800 florin mensual, pa esnan cu a perde nan trabou completo.
CARACTER
E minister, conoci pa tin un caracter emocional y di kier yuda, pase loke pase, tabatin basta defensivo riba e contenido di e rapport. Y pa ‘malo’ cu e rapport por ta, e la asumi full responsabilidad pa tur loke ta para den e rapport, y tur consecuencia cu esaki por tin. E minister ta conoci pa no core pa retonan, ni con problematico of controversial esaki por ta. E minister ta conoci pa ta hopi servicial pa e ser humano y den e postura ey, tin biaha ta sobremira e consecuencia di su bon intencion, pa cual e ta conoci pe.
NO DI ACUERDO
E mandatario, manera por a spera, a refuta gran parti di e contenido, y e palabranan ‘mi no ta di acuerdo’ por a wordo scuha na varios occasion. Entre nan, e keho di e rapport cu ‘tabatin insuficiente garantia pa evalua cada caso individual’. E mandataro a admiti cu enberdad na comienso, por tabatin personanan cu a wordo yuda sin cu nan tabatin derecho, pero cu na caminda esaki debidamente a keda coregi. A admiti cu mientras cu no ta berdad cu a yuda esnan liga cu partido so, no a trata tur hende mescos, pero cu ‘esey a evoluciona na caminda’, indicando cu esaki a keda resolve.
LEY
Tambe e mandatario admiti cu enberdad e ayudo (ainda) casi dos aña despues cu a cuminsa cu e ayudo, esaki no tin un base legal. Di otro banda, a sigura cu den e proximo dianan, esaki lo keda soluciona y cu Parlamento lo haya e ley pa trata. A admiti tambe cu a resulta (confirmacion di burocracia teribel den gobierno) tabatin departamentonan cu no tabata comunica cu otro y tabata actua riba nan mes. E ta sigura cu ningun momento a actua pa viola leuy, sino pa sostene hende pa keda bibo. E mandatario a sigura cu no mester desbalota e esfuerso humano cu a wordo eherce durante e periodo aki, y mester duna un danki na e grupo grandi di persona cu a yuda den e proceso aki. E hecho cu ta algo cu nos niun no tabatin un manual pe, tabata motibo porta pa varios fayo, pero e tabata necesario, e forma con e la traha cu su team. Y manera cu e ta bisa, por bien ta cu tabatin hopi fayo, y cu no a traha a base di ley, pero cu ‘si a warda pa e ley, hende lo a muri di hamber’.
