SANTO PATIA – Ex minister Otmar Oduber a keda traslada pa Instituto Coreccional Aruba (KIA) diamars, no obstante e no a yega e cantidad di dia cu normal un detenido ta keda traslada di un cel di warda di polis. Vocero di Ministerio Publico Ann Angela a confirma e traslado pa noticiacla, splicando cu ‘e ta un decision tuma pa Ministerio Publico a base di salud di e sospechoso’. Oduber actualmente ta den su 8 dianan di prolongacion y despues ta determina si ta prolonga su detencion pa 8 dia mas. Normalmente e ora e detenido ta keda traslada pa KIA. Ki problema exacto Oduber tin di salud, no a keda specifica. Ta prome biaha desde cu e la retira di politica, cu su salud ta den discusion atrobe. Ora cu e la retira algun anja pasa, un di e dos motibonan tabata pa su salud. E la bira notablemente mas flaco, y tabatin tur sorto di rumor riba su salud. Oduber ta deteni riba sospecho di estafa y soborno y ta e sospechoso principal den e caso penal Flamingo, cu ta trata otorgamento di tereno di gobierno den un forma ilicito.
