fbpx
August 19, 2022

Ricky Hoek (MEP): Enseñansa ta nos responsabilidad

Share on facebook
Share on Facebook
Share on whatsapp
Share on Whatsapp
0
0
Ricky Hoek (MEP): Enseñansa ta nos responsabilidad
Ricky Hoek (MEP): Enseñansa ta nos responsabilidad


Dia 10 di mei ultimo a tuma lugar e conferencia “Enseñansa, Nos Responsabilidad” na e edificio di IPA, na San Nicolas. Na prome luga mi kier a extende mi palabra di felicitacion y gratitud na e organisadornan pa un excelente conferencia. Esaki a keda organisa tanto pa G297 Na vanguardia di enseñansa (G297) (cu ta un grupo di 4 ex-maestronan di scol cu un trayectoria largo y amplio experiencia den enseñansa riba diferente nivel), Sindicato di Maestro Aruba (SIMAR) y Instituto Pedagogico Arubano (IPA). E conferencia a brinda e oportunidad pa diferente actor/instancia cu ta traha directamente of inderectamente cu enseñansa na Aruba, comparti nan pensamento, experencia y plan di maneho/vision den diferente sesionnan cu otro. Tabata tin seis topico, entre otro: 1) Enseñansa continuo y sin barera, 2) Profesionalisacion continuo di e maestro, 3) Lenganan den enseñansa, 4) Enseñansa cu sentido nacional/internacional, 5) Reto y perspectiva di/pa e maestro na pia di trabou, y 6) Ehecucion y financiamento di proyectonan di innovacion. Asina tabta tin diferente orador/experto riba e topiconan menciona y e participantenan por a dialoga riba ponencianan cu a bin dilanti. 

Enseñansa na prome lugar ta e responsabilidad di e gobierno di e pais, pa tin institutonan di educacion na tur nivel (y mas amplio posibel) pa tur ciudadano di e pais. Di e manera aki gobierno ta cumpli cu e articulo 26 di e Declaracion Universal di Derecho Humano, cu ta indica cu tur persona tin derecho riba enseñansa. Cu enseñansa ta enfoca riba e desaroyo completo di e personalidad humano y fortalecimento di respet pa derechonan humano y e libertadnan fundamental. Asina tambe articulo 26 ta bisa cu e mayornan tin e derecho di scoge tanto e tipo di criansa y e tipo di enseñansa cu nan ta desea pa nan yiu(nan). Di e manera aki, mayornan mester keda stimula y motiva e yiunan pa duna un bon prestacion nan scol. Sinembargo, tambe ta importante cu e adultonan tambe ta sigui desaroya nan mes riba e tereno di nan preferencia. Asina e concepto di ‘life long learning’ ta bira realidad y cada persona ta tuma e responsabilidad pa sigui educa su mes. Manera cu G297 a vocifera “cu enseñansa como instituto ta instrumental pa desaroyo di un pais, tanto na nivel comunitario, como na nivel individual”.

Pa loke ta trata e tema di enseñansa, fraccion di MEP tin e presidencia di Comision di Enseñansa den Parlamento y nos ta dialogando cu diferente actornan riba e tereno aki. Tambe nos ta controlando e trabounan cu Minister di Enseñansa y Deporte cual ta: 1) organisa un sistema di registro confiabel y duradero pa haya data, 2) haci un escogencia cla y consecuente den e maneho di idioma, 3) organisa un sistema di finansas eficiente, eficas y transparante pa enseñansa, y 4) traha na leynan adecua y actualisa. Asina aki parlamento ta keda traha riba enseñansa y garantisa enseñansa di calidad pa nos comunidad henter. 

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.