fbpx
August 13, 2022

Relaciona cu Dia Internacional di Museo: Anglo Kleuterschool cu evento na MANA

Share on facebook
Share on Facebook
Share on whatsapp
Share on Whatsapp
0
0
Relaciona cu Dia Internacional di Museo: Anglo Kleuterschool cu evento na MANA
Relaciona cu Dia Internacional di Museo: Anglo Kleuterschool cu evento na MANA


Dia 18 di mei ta Dia Internacional di Museo. E meta di e dia aki ta pa conscientisa riba e importancia di museonan como un medio pa trece humanidad hunto pa den cooperacion mutuo realisa intercambio cultural y enrikece culturanan. Museonan tin e poder pa transforma mundo door di siña nos di pasado y habri nos mente pa ideanan nobo pa futuro.

Riba e dia importante aki a tuma luga na Museo Archeologico Nacional di Aruba (MANA) un evento bunita cu alumnonan di un klas di Anglo Kleuterschool. Prome Minister Evelyn Wever-Croes y Minister Xiomara Maduro tawata presente pa pasa un rato ameno cu e muchanan y demas invitadonan y esunnan presente.

Prome Minister a expresa cu ta importante pa inculca den nos muchanan di chikito caba e poder di museo. Esaki ta e lema di e aña aki tambe. “Mi a purba convence nan cu door di bin museo bo ta siña hopi mes, pasa den hopi aventura y expande bo conocemento mescos cu ora bo biaha”, prome minister a expresa.

Ta hopi importante tambe pa nos conoce nos raisnan y sa di unda nos ta bin ya for di un edad hopi tempran. E muchanan di Anglo Kleuterschool tin apenas entre 4 pa 6 aña. Na e edad aki, e muchanan tin hopi interes y un imaginacion hopi grandi, pero mas importante nan tin un curiosidad hopi grandi. “Mi ta hopi contento cu nos a logra haci e bishita aki. Mi kier gradici Anglo Kleuterschool y SKOA pa e oportunidad aki y tambe na MANA pa yuda nos organisa esaki. Pabien na cada persona cu a contribui na esaki”, prome minister a expresa.

Prome minister ta encurasha pueblo di Aruba en general pa specialmente riba Dia Internacional di Museo, pa bishita museo y stimula nos muchanan pa bishita museo. “Stimula nos muchanan pa siña mas di Aruba y stimula nan curiosidad. Pasobra ta asina nan ta bira hobennan sabi y por guia nos pais mañan”, prome minister a termina bisando. 

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.