fbpx
August 15, 2022

Discurso di Minister Xiomara Maduro na nochi cultural di XII Congreso di Carosai

Share on facebook
Share on Facebook
Share on whatsapp
Share on Whatsapp
0
0
Discurso di Minister Xiomara Maduro na nochi cultural di XII Congreso di Carosai
Discurso di Minister Xiomara Maduro na nochi cultural di XII Congreso di Carosai


E siman aki a tuma luga e conferencia di CAROSAI di tur e controlarianan general di Caribe y diaranson ultimo a brinda e participantenan un anochi cultural pa asina nan por cera conoci cu nos herencia cultural cu ta exponi na Museo Archeologico Nacional y tambe disfruta di nos musica. Minister di Cultura Xiomara Maduro a hiba palabra na e participantenan di e congreso y a trece dilanti cu no tin miho luga pa celebra e anochi cultural, pasobra ta realmente maraviyoso pa bo ta na un luga caminda bo por familiariza hopi cu e historia di Aruba. Museo Archeologico Nacional di Aruba ta e miho luga pa bo siña di e historia rico di nos pais asina Minister di Cultura a trece dilanti na inicio di su discurso. E mandatario a splica cu e prome museo archeologico di Aruba a habri su portanan como 40 aña pasa den un edificio chikito banda di Renaissance Hotel. E tabata un “showcase” y na 2009 e museo a muda pa e vivienda antiguo renoba di famia Ecury. Esaki a bira posibel pasobra famia Ecury y Gobierno di Aruba a yega na acuerdo pa preserva e monumento aki. Atrabes di e 8 fondo europeo pa desaroyo di Union Europeo y fondonan publico a haci e restauracion aki posibel y a conecta e dos edificionan nobo. UNOCA a financia e instalacion di e museo moderno aki. Minister di Cultura Xiomara Maduro a splica e bishitantenan cu Museo Archeologico Nacional di Aruba tin un coleccion di mas di 10 mil artefactonan indio-americano cu ta abarca den e periodo pre-ceramico, ceramico y cultural historico, cual ta un variedad di obhetonan di ceramica, concha, piedra, weso y glas. E coleccion ta inclui un gran cantidad di artefactonan cu ta expresa e bida di indjannan di Merca y e bida spiritual como tambe e red di comunicacion cual a conecta Aruba cu Europa, Mexico y centro di Sur America. E anochi cultural aki a wordo organisa pa Controlaria General di Aruba y Departamento di Cultura na Museo Archeologico, ariba Dia Internacional di Museo.

 

Un dia special den cual nos ta recorda e papel crucial cu museo ta desempeña den exhibi nos patrimonio pa asina promove e respet pa e diversidad cultural na Aruba y aprecia nos patrimonio nacional. Museonan ta un medio importante pa intercambio di culturanan y desaroyo di comprension mutuo, e cooperacion y paz entre personanan. Minister Maduro a felicita y gradici tur cu ta apoya y ta duna nan dedicacion continuo y compromiso na nos museonan di un manera of otro. Pa promer biaha Aruba y un Pais di teritorio Hulandes ta asumi e presidencia di CAROSAI, cual responsabilidad a yega pa Aruba na un momento special caminda Controlaria General di Aruba ta cumpli 35 aña. Un felicitacion pa e Presidente nobo, Sra. Xiomara Croes-Williams, nos ta sigur cu hunto cu e miembronan di su comision lo traha pa logra e vision y mision di Carosai. Un danki tambe na Carosai pa a scoge Aruba pa ta sede di e congreso aki. Minister Xiomara Maduro a expresa palabra di gratitud y aprecio pa tur participante na e congreso, tur esnan di exterior cu mester a biaha pa bini Aruba y esnan cu a sigui esaki den forma virtual como tambe danki na esnan local cu a participa. Palabra di danki tambe na tur organisacion y institucion local y di exterior cu a participa y coopera. Aruba ta contento, honra y agradeci pa nan presencia. Danki tambe na tur cu a yuda pa organisa e congreso aki. Aruba ta parti di un mundo global cu su posibilidad- y retonan. E poblacion di Aruba a demostra un gran flexibilidad y resiliencia durante pandemia di Covid19. Mediante innovacion continuo, reconociendo e poder di colaboracion na nivel local y internacional. Nos lo sigui traha na desaroyo sostenibel di Aruba y logra bienestar general di nos hendenan. E sosten di CAROSAI pa yuda nos logra un mayor resultado pa un miho calidad di bida di nos hendenan ta wordo aprecia. Tabata un anochi ameno den cual tabata tin presentacion cultural di baile y musica y na final a deleita e participantenan di CAROSAI cu un brassband cu a compaña nan bek na nan hotel.

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.