fbpx
August 15, 2022

Otro edicion di curso empresario independiente chikito/mediano a culmina exitosamente pa 12 participante

Share on facebook
Share on Facebook
Share on whatsapp
Share on Whatsapp
0
0
Otro edicion di curso empresario independiente chikito/mediano a culmina exitosamente pa 12 participante
Otro edicion di curso empresario independiente chikito/mediano a culmina exitosamente pa 12 participante


Cu hopi orguyo Camara di Comercio y Industria Aruba (KvK) a otorga certificado na e 12 cursistanan cu a termina e curso Empresario Independiente Chikito/Mediano 2021-2022. Esaki ta di 7 aña cu e curso ta wordo ofreci pa e empresario of e persona cu ta desea di bira un empresario. Meta di e curso ta pa e (futuro) empresario por ta miho prepara den maneho di su negoshi. E curso a inicia na september aña pasa y tabatin un trayectoria amplio y cu no tabata facil pero cu sigur ta brinda e herment necesario na e (futuro) empresario. E curiculo diseña door di Camara di Comercio y Industria Aruba (KvK) ta special pa e formalisacion di un empresa chikito/mediano (SMEs).

E cursistanan a sigui pa 8 luna intensivo les semanal riba diferente materia consistiendo di un cantidad amplio di topico entre otro marketing, legislacion, finanzas y administracion, impuesto, liderazgo y varios otro aspecto manera diseña y presenta un business plan. Hunto cu esaki nan a haya e oportunidad pa promove nan mes pa bin na remarke pa financiamento via Qredits.
KvK kier logra via e curso pa informa y educa e (futuro) empresario pa ta miho prepara na momento di establece y maneha su negoshi. Pa e cursistanan e periodo di curso tabata un periodo extenso cu a rekeri hopi dedicacion y trabou duro pa por pasa nan examen cu exito. Algun persona tin un negoshi caba y otro tin nan trabou diario pues e estudio y preparacion pa cada les den oranan liber sigur ta un sacrificio.

Ta remarcabel con anima e cursistanan ta y alabes cu e curso ta brinda nan e oportunidad di amplia nan network comercial. E curso ta rekeri un porcentahe di presencia di 80%. Sin cumpli cu esaki e ta bira dificil pa completa e curso cu exito. Esnan cu a completa e curso a ricibi nan certificado.
Entrega di certificado a tuma luga diabierna ultimo, 20 di mei 2022 na KvK, sigui pa un celebracion ameno cu familiar y amistades. Director Ehecutivo, sr. Martijn Balkestein, a felicita e cursistanan y a bisa algun palabra di estimulo pa sigui dilanti y cu KvK lo ta semper na nan disponibilidad. Despues di esaki sr. Balkestein a otorga e certificado na e cursistanan.

Hunto cu e balor cu e certificado tin pa e persona y su negoshi, e logro aki di e cursista lo wordo registra na Camara di Comercio na momento cu e negoshi wordo inscribi.
Palabranan di gratitud ta bay na tur esnan cu a coopera na realisa e curso aki cu nan experticio y dedicacion: Dave Martinus, Hilde Rodriguez-Taekema, Mary Baarh, Charisse Hoen-Daly, Rothmar Coenraad, Charitza Statia, Gos Oduber, Diederik Kemmerling, Mark-Benson Denz, Bruce Harms, Boy Ecury, Joselyn Koolman, Ronald Erasmus, Roberto Lejuez, Herbert Diaz y e team di Qredits Aruba.

E siguiente curso di Empresario Independiente ta planea pa start na september 2022 y lo culmina durante luna di mei/juni 2023. Fecha exacto lo wordo comunica dentro di poco. Tur esnan cu kier participa den e siguiente curso 2022-2023 por cuminsa registra di awo caba. Pa participa ta pidi pa manda bo CV pa [email protected] Pa mas informacion por tuma contacto cu departamento di Business Information & Support na [email protected] of yama na 5821566 ext. 30/35/42.

KvK ta spera di por sigui brinda e apoyo y educacion necesario pa un y tur cu kier cuminsa cu su empresa por ta bon prepara pa esaki.

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.