fbpx
August 13, 2022

A detene estafado cu ta tuma cen sin duna tereno

Share on facebook
Share on Facebook
Share on whatsapp
Share on Whatsapp
0
0
A detene estafado cu ta tuma cen sin duna tereno
A detene estafado cu ta tuma cen sin duna tereno


Un señora, A. Bennet, ta pasa su fin di siman drumi den cel na ward’i polis pasobra ta masha dia tin un ordo di detencion p’e. Ta acus’e di estafa cu tereno. Pa awo e ta un sospechoso y tin cu duna cuenta na husticia. 

Pa basta dia ta busca su drechi, pero e ta blo sconde pasobra e sa cu nan lo bay p’e. Ki ora polis yega na unda e ta biba, ta bisa e no t’ey. Pero awe porfin su ‘number a hunga’.

Tin varios keho entrega contra dje, acusand’e di ta tuma placa for di varios hende. E ta tuma cen como adelanto riba un supuesto benta di un tereno. 

E denuncia na recherche ta cu finalmente ningun hende ta haya tereno despues di regla e downpayment. Ta sospecha cu e ta coy e placa p’e. Basta mil florin y varios hende a bay haci denuncia contra e sospechoso A. Bennet.  

Despues cu tin ordo di detencion y no por logra su paradero, a blokia tur salida legal p’e. E señora a bay hunga su suerte door di purba biaha y bandona Aruba y laga e problema atras. Pa sabi cu e ta den “hustle” hende cu tereno, e no sa cu na aeropuerto, polis ta hinca su nomber den computer y asina e drenta of sali Aruba, ta para bo! 

Asina cu el a check-in na e aerolinea, pasa control di siguridad di boarding-pass y ora el a yega Migracion, el a realisa cu te ey su suerte a yega. Asina cu a pasa su paspoort den e sistema, tur luz cora a cende riba e pantaya y ta informa Migracion pa avisa polis cu un sospechoso ta purba scapa di husticia. 

Mesora polis di frontera a bin cerca dje, a deten’e y a transport’e pa oficina di recherche pa mas investigacion. Ey a present’e dilanti un sub-fiscal cu a bis’e su derecho y inform’e cu e ta keda cera pa interogacion.

Tuma placa for di diferente hende sin entrega tereno, ta cay bou di e articulo di estafa den nos codigo penal. Awo e lo pasa den e proceso di interogacion pa confront’e cu tur e denuncianan haci, e pruebanan presenta y mira con e tin pensa di hustifica su echonan. 

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.