fbpx
October 01, 2022

Rok Cup Colombia: E coredonan di karting di Aruba y Corsou ta di nivel halto

Share on Facebook
Share on Whatsapp
0
0
Rok Cup Colombia: E coredonan di karting di Aruba y Corsou ta di nivel halto
Rok Cup Colombia: E coredonan di karting di Aruba y Corsou ta di nivel halto


E no ta un secreto cu e coredonan di karting di Aruba y Corsou ta haci un tremendo papel ora ta competi den exterior. Na Aruba, tin polemica relaciona cu e pista di karting pa train. Practicamente e coredonan di karting tin cu biaha p’asina por haci locual mas nan gusta, esta karting. 

Den fin di siman a tuma luga careda importante na Colombia. E pista di karting Kartodromo Juan Pablo Montoya tabata anfitrion di e evento aki. E team di 24ora.com tabata presenta p’asina cubri tur parti di evento aki. No ta prome biaha cu e team di 24ora.com ta haci cobertura na e pista aki. E pista ta keda na Taconcipa, cu ta keda algun ora leu for di Bogota.

Ta e fin di siman prome e coredonan di Aruba tabata na Corsou pa un competencia di karting, kende a sali den premiacion tambe. E coredonan di Aruba manera Matthew Peasch y e rumannan Arends semper ta representa Aruba na Colombia den competencia di karting grandi. No ta Aruba so, Corsou tambe ta mirando un crecemento den karting. Aña pasa mes tabatin henter un ekipo di Corsou cu a participa na careda di karting na Cajica, Colombia. 

Andres Coral ta na cabes di Rok Cup Colombia. Durante un entrevista el a conta cu e coredonan di Aruba y Corsou a haci falta e biaha aki pero e sa cu e siman prome nan tabatin careda na Corsou. Coral a subraya cu e coredonan di Aruba y Corsou ta di nivel. Na augustus y december proximo lo tin evento grandi di karting, entre nan e Pan Americano cu lo tuma luga na Villavicencio, Colombia. Coral a nota un crecemento di participante den e eventonan di Rok Cup Colombia. Den fin di siman a participa casi shen piloto. E mundo di karting ta manera un famia segun Coral.  Ta spera pronto presencia di Aruba y Corsou den e eventonan di Rok Cup Colombia.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.