Diasabra mainta a sosode un accidente entre un van y un e-scooter. E van a laga un auto pasa riba caminda di preferencia den Santa Helenastraat. E chauffeur di e van no a mira e homber cu riba e e-scooter ya bin tras di e auto.
Ora a sali di Consuelostraat pa subi Santa Helenastraat a dal e persona riba e e-scooter. E homber riba e step a cay y haya rasca na curpa. E chauffeur di e van a bati alarma mesora y polis cu ambulance a yega di biaha na e sitio. A atende e homber levemente herida na e sitio mes.
Ora polis di trafico a yega a atende cu ambos persona envolvi. A mustra e homber riba step cu e vehiculo ey tin motor. A mustr’e tambe cu mester tin number y seguro pa move riba caminda. No por subi caminda cu un vehiculo di motor sea di combustible of motor di coriente sin documento.
Polis tin hopi dolor di cabes cu e vehiculonan aki ultimamente cu no tin mucha claridad pa trafico. Polis ta para ariba cu nan tin motor di coriente y mester tin documento paga di belasting y seguro pa move. Finalmente e chauffeur di e van mes a yuda e homber yega cas cu su e-scooter ora tur cos a caba. Seguro di e van lo cubri tur gasto.
