fbpx
July 06, 2022

CURPA: No por permiti ripiticion di historia di mal gobernacion

Share on facebook
Share on Facebook
Share on whatsapp
Share on Whatsapp
0
0
CURPA: No por permiti ripiticion di historia di mal gobernacion
CURPA: No por permiti ripiticion di historia di mal gobernacion


Un pais cu no conoce su historia ta core e riesgo cu e historia lo ripiti. Awe nos historia ta ripiti. Partido MEP, un partido politico social democrata, pero patras di ideologia aki tin e mentalidad comunista. Partido MEP ta un partido populista cu semper a traha riba emocion di pueblo. Tur hende tin culpa di e consecuencianan di mal gobernacion menos MEP. Nan ta e victima. Partido Mep ta un copy-paste di partido MEP di Venezuela cu ta profesa socialismo-nacional popular. Un partido politico izquierdista cu ta un lobo bisti na carne. Un partido politico cu ta stima su pais no ta destrui su pueblo sin ta traha pa bienestar di su pais. Nan ta critica capitalista pero capital ta pa nan y miseria pa pueblo. E manera di opera di un partido comunista ta sembra discordia y destabilisa un pais pa yega na poder.

Na November 2000 y na augustus 2015 partido MEP a lanta pueblo. Situacion financiero ta hopi malo y Aruba ta den perde su Status Aparte. Nos por corda riba e mega debe y awe nan tambe ta forma parti di e mega debe. Den 5 aña di gobernacion no a bin cu ningun proyecto pero si hopi medida. Nan plan di gobernacion ta consisti di medida riba pueblo y huur edificio y hisa gastonan di gobierno cu na final nos pueblo mester paga. Awe nos debe ta mas halto cu nunca. Ora bo mira e grafiek ta dos color bo ta mira geel y despues berde.

Den 2022 nos por mira cu nos pueblo ta sufri pasobra costo di bida a bira hopi caro. Nos costo di bida a subi cu mas di 50%. Un hende grandi no por biba mas di un pensioen. Esnan cu ta gana minimumloon nan placa no ta yega mas y mas pio esnan cu ta biba di un onderstand y esnan cu no tin trabao.

Nos ta sinti cu e gobierno aki no tin confiansa mas di pueblo y cu nan popularidad ta te na piso. Pa nos di partido CURPA no ta nada nobo pasobra nos a alerta pueblo for di un principio. Un cos ta sigur cu nan imagen ta destrui y mas nan keda na poder mas nan ta coba na mesun tumba. Nan mes a destrui nan mes paso nan no tin palabra. Awe cu nan actitud nan ta demostra ta ken nan ta.

Por corda nos minister-president a anuncia prome cu e manifestacion di sindicatonan cu empleadonan publico lo ricibi 5% di nan salario y pa 2023 lo haya e otro parti cu 7.6%. Nos por corda cu nos minister-president a bisa cu: “de kogel is door de kerk” y cu nos Parlamento ta contribui den sensacionalismo,  awe nos por mira cu un biaha mas nos premier a wordo saca out for di base. Un mayoria  grandi di nos pueblo no ta kere mas den e sprookjes di nos gobierno. Un gobierno cu no tin integridad y cu ta sali di escandalo pa otro. Nan lo por scapa di e husticia terrenal pero di esun di ariba si nan no lo scapa. Tur e mentira nan cu nan a sembra, den e proximo eleccion nan lo bay recohe e cosecha di mentira. E 12.6% mester keda graba den mente di empleadonan publico pa locual cu ta e aña aki.

E buraco cu gobierno a coba pa pueblo nan mes lo cay aden. Pronto nos lo lesa e anuncio di e fin di e gobierno aki y ki dia e acto aki lo tuma lugar. Normalmente lo tabata di luto pero e biaha aki pueblo lo celebra e anuncio di morto di e gabinete aki.

Aruba, nos unico caminda cu ta keda nos ta di busca Dios pa nos por mira e cambio y pa por haya Dios su bendicion. Nos mester pone un fin na e maldicion cu nos ta bibando den e ultimo añanan. Nos como pueblo mester humiya nos mes y busca cara di Dios y hala for di e mal caminda. Dios lo scucha nos oracion for di shelo y lo pordona nos picanan y lo sana nos tera. Esaki ta nos unico caminda pa nos por biba di e bendicion di Dios. Nos di partido CURPA ta hasi un apelacion na e parlamentarionan cu ta bisa cu nan ta kere den Dios. Ta tempo pa bisa ta basta na inhusticia y para banda di pueblo pa husticia. Si boso no hasi esey boso ta  sigui forma parti di e malo. Si juni ta luna di orguyo, juli lo bira luna di caida.

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.