Magic FM como bo emisora cu ta cubri tur eventonan historico, ta cla prepara pa trece pabo e evento deportivo mas grandi cada 4 aña, esta COPA MUNDIAL cu pa aña 2022 lo tuma luga na Qatar, cuminsando 21 di november pa 18 di december 2022. Ta bay tin un total di 64 wega
cu lo keda hunga durante e temporada di mundial, di cual e emisora lo cubri e gran mayoria pa nos isla. E deporte di futbol cu ta trece diferente pais hunto.
Un total di 32 ekipo lo bataya pa asina mira cua team ta bay cas cu e codicia copa mundial. Teamnan manera: Alemania, Argentina, Belgica, Croacia, Dinamarca, Spaña, Francia, Inglatera, Polonia, Portugal, Uruguay, Serbia, Suiza y Hulanda, Brasil, USA, Ecuador y Uruguay tambe ta cla.
INTRODUCIENDO E CARANAN NOBO HUNTO CU CADOCHI KOCK
Magic FM a prepara un team di comentarista capacita y cu amplio experiencia den e tereno di futbol cu lo duna tur e detayenan di e hungadonan y tambe e stadisticanan di e weganan, combina cu e historia di Copa Mundial kende ta Cadochi Kock y e biaha aki introduciendo cara no desconoci den e mundo di futbol, esta Arianne Westerburger y Devin De Veer, ambos conoci como lider femenino actual den e mundo di futbol infantil y hubenil.
KEN NAN TA?
Cadochi Kock
Conocido presentado cu ta cumpli 40 aña den transmision e aña aki y naracion di e weganan di futbol. Despues di a presenta deporte pa hopi aña na television, a transmiti na radio y tin un carera impresionante den deporte, e aña aki un biaha mas ta bay comparti su experiencia y conocemento di e mundo di futbol den e weganan mundial di QATAR 2022 un biaha mas. El a cuminsa su carera como narador aña 1982 ora cu AJAX a bin hunga hunga na ARUBA contra RCA dia 7 di januari 1982 y e no por a hunga ya cu el a kibra pia den e ultimo wega di campeonato cu tabata 15 di december 1981.
Tabata Janchi Tromp EFM cu a invita Cadochi pa comenta e wega RCA / AJAX hunto cu ne. Janchi tabata nara y Cadochi a comenta y el a cay na agrado di hopi oyente. El a sigui comenta cu Janchi, trahando den casino y coleganan di trabou tabata bisa Cadochi pa sigui nara. Cadochi a transmiti varios wega pa Z86 tanto aki na Aruba como Corsou. Alabes a transmiti pa TELE CURACAO durante un torneo internacional cu Inter milan- Santos-sel di Venezuela y UNDEBA refoinforsa hunto cu Don Hector Rosario y Sol confedor.
Alabes a transmiti varios wega hunto cu Gonzalo Cuales na Tv 11 y a transmiti eliminatorio pa MUNDIAL 98 for di Baranquilla durante e wega entre Argentina y Colombia. Cadochi
a transmiti for di Trinidad y Surinam na diferente ocasion. Varios aña tambe na e canal ATV, a cuminsa cu wega di Mundial, Copa America, Copa Confederacion -Copa Europa y weganan eliminatorio.
E aña aki lo ta di tres Copa Mundial cu e ta bay nara pa MAGIC 96.5 FM. Cadochi keto bay ta mantene su mes den condicion door di ta constantemente den movecion cu futbol, ta hunga golf y ademas ta keda activo cu cana tur dia. Famoso pa canta su golnan y nara wega den su estilo unico.
Devin De Veer
Tin 28 aña di edad y a nace aki na Aruba. El a cuminsa di chikito den landamento sincronisa desde su 9 aña di edad y cu 13 aña tabata forma parti di e team nacional di Aruba y a representa nos isla na Republica Dominicana, Corsou y Puerto Rico e.o. Devin a biba dos aña na Corsou y aya a coach Club di Synchro.
Devin a hunga Volleyball pa seis aña largo. Ademas di tin un trabou importante den e compania META CORP, su amor pa deporte ta bisto y despues di a bin bek Aruba ta envolvi cu RCA y ta lider di muchanan bou di 5 aña. E tin su licencia D como coach di futbol y ademas e ta fungi como miembro di board di e team di RCA.
Arianne Westerburger
Ta mama di dos, cu un amor y pasion pa e deporte futbol. Naci y biba na Aruba den e bario di Companashi. Arianne a lanta ta haci ballet y baila den grupo di baile y canta den coro (De Trupialen). El a cuminsa haci e deporte rey cu e edad di 12 aña pa su team RCA y a sigui haci e deporte aki te na un edad mas adulto. El a hunga seleccion di Aruba contra entre otro Corsou, Boneiro, Colombia y USA (college team). Ademas di su trabao, Arianne a subi escenario pa prome biaha cu su 15 aña na Corsou cu e orkesta OREO. El a forma parti tambe di Zeta Band, DLS y awo despues di algun aña den background, ta forma parti di e banda SUONA. E amor pa futbol ta algo cu el a lanta cu ne biniendo for di un famia futbolistico diariamente. A yega di hunga pa Riverplate y SV Dakota y ta gradicido na e team y coach. Na aña 2018 a acerc’e pa bay bek RCA na unda a hunga pa mas o menos 2 aña. Awor Arianne ta forma parti di e Bestuur di RCA for di december 2021 como secretaria y tambe como leidster di division U20.
NA CAMINDA PA MUNDIAL
Lo tin un ‘NA CAMINDA PA MUNDIAL’ cuminsando desde luna di augustus y despues lo desemboca den transmision y cobertura di e weganan mas grandi y importante cu lo cuminsa oficialmente na november te cu 18 di december 18. E weganan lo ta 06:00 am – 09:00 am, 12:00 pm y 3:00 pm y e emisora lo cubri practicamente esunnan mas popular durante henter e temporada.
