Dialuna dia 20 di mei, conhuntamente cu colega Minister Glenbert Croes, Minister Dangui Oduber a bishita e Job Fair di Aruba’s Food & Beverage Association. E sector aki ta hopi importante pa nos turismo. E fair tabata un exito rotundo caminda cu tabatin diferente organisacion presente cu mas di 50 vacatura habri den sector di Hospitalidad y Turismo.
Minister Oduber a menciona e echo cu e di dos caminda cu e turistanan ta gasta mas placa despues di hotel ta den food & beverage. E ta un industria hopi importante den e sector turistico cu e ultimo tempo tin su retonan cu ne pa e cantidad di vacatura cu tin pa yena, asina e mandatario ta expresa.
Minister Oduber ta pone enfasis riba e echo cu tin hopi oportunidad pa trabou pa tur hende, hopi ta esunnan cu a acudi pa aplica pa un trabou. Danki na nos clase trahado nos ta logra nos meta di bay dilanti y recupera nos turismo.
Minister ta indica cu e ta satisfecho pa wak asina hopi hoben presente na e job fair aki, buscando oportunidad pa sigui bay dilanti y hiba Aruba dilanti. Un danki special na Aruba Food & Beverage Association pa tuma e iniciativa aki y semper nan lo tin nos apoyo y hopi orguyoso di DPL cu tambe tabata presente.
Minister Oduber a subraya riba e echo cu Aruba ta e di dos pais na mundo cu a recupera mas lihe for di e pandemia. Ya caba Aruba a yega y asta surpasa e nivelnan di turismo di aña 2019 cu tabata un aña record den turismo na Aruba. E mandatario ta mira e perspectiva pa nos turismo hopi positivo y pa e motibonan aki ta organisa un Job Fair, door cu tin un demanda hopi halto pa cu personal.
Segun e mandatario encarga cu turismo, esaki ta yena su persona cu un satisfaccion enorme mirando cu su tarea como gobernante ta pa percura pa turismo crece, percura pa stimula e economia di Aruba. Pa asina crea e cuponan di trabou necesario pa e pueblo di Aruba. E echo cu a organisa un Job Fair ta pasobra e cuponan di trabou ta disponibel, ta cuestion di pasa e proceso di solicitud pa asina wak ken ta bin na remarke pa haya un trabou.
Minister Dangui Oduber ta sumamente positivo pa e ultimo desaroyonan cu tin pa cu Aruba su turismo den e lunanan nos dilanti.
