fbpx
August 15, 2022

Domino di bou palo ta muda pa bou dak

Share on facebook
Share on Facebook
Share on whatsapp
Share on Whatsapp
0
0
Domino di bou palo ta muda pa bou dak
Domino di bou palo ta muda pa bou dak


Shonnan amante di domino caliber “world class”, e fin di siman aki, diasabra 25 di juni cuminsando pa 8:00 pm, lo tin e sambombaso cu un y tur tabata spera pa basta luna caba!

E revancha di siglo! E ora pa paga lomba porfin a yega! Si shonnan, e unico y mundialmente famoso Domino Square Garden un biaha mas lo ta scenario di otro encuentro espectacular den e arte di pega piedra!

E famoso Team SNOR, bou guia di e “beruchte dominoloog” Snor Perez, a pidi revancha contra e ekipo cu biaha pasa a laga Team SNOR pega bou e palo di mal ehempel aya na Highway 69 na Calabas! Pero, wanta … Snor a haya un sorpresa total ora cu su carta di revancha a bin bek cu stempel “adres onbekend”!

E conocido y notorio Gibi Webb no a keda para keto tampoco y mientras tanto a muda su ekipo di “Team BOU PALO” pa awor “Team BOU DAK”, anto cu e apodo “KILLER DOMINO TEAM”! Cambio den real estate dus, nificando cu no ta “zomaar een Gibi” Snor lo bay topa e biaha aki! Biaha pasa Snor tabata dilanti te ora na ultimo momento Gibi a mustrele cu tanten solo no baha, careda di bina no ta caba! Den last lap, na un moda sensacional, Gibi a “come from behind” y caba cos cu score di 21-19!

Shonnan, diasabra awo 25 di juni, e candela di San Juan lo bay keda chikito! Si San Juan ta bin e ta bin of ta bay e ta bay, e unico y mundialmente famoso Domino Square Garden lo ta e scenario di un bataya estilo “un pa tera, un pa lama” diasabra awor 25 di juni, cuminsando pa 8 or di anochi!

“Un tal” Gibi lo por pone awa yobe bou dak? Snor lo tuma beslag ariba e dak y manda Gibi bou palo bek? Bin diasabra awor n’e unico Domino Square Garden na mundo y haya sa pa bo mes! Manera di custumber, entrada ta completamente gratis y na halftime e famoso snacknan procedente di “verre oosten” lo lora completamente por nada! Yega shonnan, pasobra un tabla lo bula diasabra awo 25 di juni cuminsando pa 8’or di anochi!

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.