Den un partido emocionante y yena di grito y sosten di fanaticada, e team di SV Dakota ta empata e di dos wega di final pa asina titula su mes Campeon Division Honor. Fernando de Sousa a score e dos goal pa e team di SV Dakota y pa SV RCA Jeanluc Bergen a score dos penalty.
Un wega hopi emocionante y cu publico grandioso den ambos tribuna. Sosten pa ambos tabata den gran forma caminda cu musica y animo di e fanaticada tabata brinda e apoyo na cada team cu cada hugada. Na e di dos tempo y despues di dos penalty e team di Dakota a sali decidido pa caba cos y bringa pa e titulo maximo. Palabra di pabien ta bay pa e staff, coaching team, fanaticada y muy specialmente na tur hugadon di team Dakota cu awo ta Campeon AVB 2022.
Den e euforia di victoria cu nan titulo maximo, e fanaticada enorme di SV Dakota conhuntamente cu henter e team a subi caya di Dakota den un parada di victoria direccion Centro di Bario Dakota pa e celebracion. Bou grito y pitro di auto e caravana di alegria a pasa den Dakota pa comparti cu tur e triunfo campeonil.
E rumannan Jonathan y Gregory “Dedo” Lake, hunto pa prome biaha ta gana un titulo di campeon como entrenador y asistente di un ekipo di Division di Honor. Den e caso aki nan ekipo di cas y infancia, Sport Vereniging Dakota. Ta numeroso titulo di campeon Jonathan y Dedo a gana hunto como hungado, pero esaki tabata nan di prome como tecnico hunto.
SV Dakota ta existi desde aña 1947 caba y durante e su trayectorio a sa di logra conkista e titulo di campeon di futbol division di honor na mas di un ocasion den pasado. Sinembargo, e ultimo biaha cu el a bay cas cu e trofeo tabata na 1995.E organisacion ta conta cu futbolistanan di tur edad, cuminsando cu Mini baby, Baby, Lifida A, Lifida B, Menor, Mayor, Junioren, Damas y Division Honor. Na tur ta papia di mas o menos 175 hungado den total. Den e seccion di Division Honor, ta conta cu un ekipo cu 25 hungado, 4 staff tecnico y 4 miembro di directiva. Coach ta Jonathan Lakie cu ta conta cu un amplio experencia den futbol local.
Potret cortesia: Jan Poets y 297 Sports
