fbpx
October 01, 2022

Parlamentario Arthur Vallejo no ta wak pakico no por opera na ImSan

Share on Facebook
Share on Whatsapp
0
0
Parlamentario Arthur Vallejo no ta wak pakico no por opera na ImSan
Parlamentario Arthur Vallejo no ta wak pakico no por opera na ImSan


Recientemente a puntra Parlamentario Arthur Vallejo tocante e situacion entre su persona y Dr. Horacio Oduber Hospital despues cu for di maart directiva di hospital a manda carta pa ImSan, AZV y tambe Inspectie Volksgezonheid Aruba indicando riba e echo cu Vallejo no ta autorisa pa realisa cirugia di kaak, pero haci uno toch riba un pashent.

E parlamentario di fraccion Movimiento Electoral di Pueblo (MEP) a bisa di nunca a haya un carta personalmente for di hospital of tabatin contacto tocante e topico. Vallejo ta sinti cu e director actual di hospital, drs. Jacco Vroegop, cada bes cu por, ta purba desacredita e sistema di AruBIG y cu realisa e tipo di operacionnan aki na Aruba mes, lo scapa e isla un cantidad enorme di recurso.

“Si mi ta bay traha den mi profesion, cu ademas ta un profesion cu ta exigi hopi esfuerso y dedicacion, mi no mester bay pensa y preocupa mi mes cu kisas e director ta den mi contra”, asina Vallejo a expresa basa riba e experiencia di su tata, e internista cu den pasado tabata autorisa pa practica medicina na Aruba. “Mi lo kier traha den e miho ambiente posibel; p’esey mi opcion lo ta ImSan pa e cultura di apoyo pa e profesional na ImSan.”

El a splica cu na ImSan nan kier haci nan best, cu e pashent ta den e miho mannan, cu e ciruhano tin tur ekipo disponibel y cu e operacion cu a haci riba e pashent a bay den excelente forma. Ta kere cu ta importante pa haci cosnan di manera sabi y aunke hospital ta keda e luga pa maneha casonan mas complica, por determina tambe ora cu por trata un pashent na Aruba mes y na ImSan, por ehempel. Claro cu e back up di un ICU y cooperacion di hospital.

“E solucion t’ey pa haci tur cos na ImSan. ImSan su instalacionnan ta fabuloso. Ora bo drenta eyden ta mescos bo a drenta un luga na Europa, na Alemania. Ami ta kere personalmente cu por haci hopi mas den e OK di ImSan”, asina Arthur Vallejo a declara. E ta sigura cu, cu e cambio di AruBIG, Aruba ta bay haya mas profesional mas specialisa y cu nos por brinda mas procedemento na cas.

“A tuma nos un pandemia, un situacion economico financiero grave pa nos cay na cuenta cu nos ta mandando demasiado pashent afo, cu e ta un carga hopi grandi pa cu salud, finanzas y e parti economico di Aruba. Ta miho pa paga specialista na Aruba. Segun Vallejo, e specialista ey tin di bay paga belasting tambe, dus bo ta wak algo di e placa bek en bes di manda afo. A indica cu un tempo Aruba a paga 32 miyon dollar pa aña na esaki. “E logica ta pa nos mes por of trece specialista bin traha y pakico no duna oportunidad na nos yiunan di tera.” 

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.