fbpx
October 01, 2022

Husticia no ta cla cu ne: A prolonga detencion di dentista Kawaiah

Share on Facebook
Share on Whatsapp
0
0
Husticia no ta cla cu ne: A prolonga detencion di dentista Kawaiah
Husticia no ta cla cu ne: A prolonga detencion di dentista Kawaiah


Den fin di siman hues-comisario a bay di acuerdo cu e peticion di fiscal di Ministerio Publico, pa prolonga detencion di dentista Abdalhadi Kawaiah cu un maximo di ocho dia mas. A deten’e diaranson anochi na su consultorio sitia na Cumana. Diabierna, ora e dos dianan a yega, fiscal a pidi pa want’e mas dia aden pa por caba cu e investigacion contra dje.

Te cu awor, e acusacion ta cu dentista Kawaiah ta practica tratamento como orthodontista sin cu e ta autorisa pa haci tal. Es mas, DVG a kita su licencia pa e por practica medicina na Aruba y AZV a kibra su contract di trabou. Asina mes, burlando di nos sistema, el a opta pa toch sigui practica y a atende pashent despues di e prohibicion.

Pashent a keda den incertidumbre

E ultimo dianan aki pashentnan cu normal ta cu dentista Kawaiah, ta acercando otro dentista pa por haya cuido. Nan ta presentando cu varios storia lamentabel, di lo a paga adelanta pa servicio y cu awor nan lo no haya dicho servicio. Ta pidiendo otro dentista pa tuma nan caso over, pero sin cobra pasobra nan a paga Kawaiah caba. Ta cuestion di ward’e sali di prizon, pa e por responde pa e sumanan di placa cu el a cobra di pashent sin cu e tin derecho pa haci esey pasobra e NO mag di practica como orthodontista na Aruba! Specialmente mucha cu a pone beugel, awor ta sinti cu nan a keda sin dentista y sin retainer pa sigui cu nan tratamento.

AZV a regla otro dentista caba

AZV a informa diahuebs cu a termina e contract cu “ortodontista” A. Kawaiah pa motibo cu e no a haya Decreto Ministerial nobo pa por sigui traha na Aruba. E intencion ta cu entrante 1 di juli tin un ortodontista nobo, den persona di Jesús Enrique Gualdrón Escalona. E ta un ortodontista cu a specialisa na Universdad El Bosque na Bogotá. E tin 39 aña di edad y ta domina nos idioma Papiamento.

Lo traspasa tur aseguradonan di AZV cu tabata cerca Dr. A. Kawaiah (cu machtiging valido) pa servicio cerca dje. Lo informa nan riba corto plazo con e traspaso di Dr. Kawaiah pa Dr. Gualdrón lo tuma luga. Dr Gualdrón Escalona ta bay traha na Vital OMS Dental Clinic NV. na Boegoeroei 49B (banda di SaveMore), cu ta e clinica di dentista (y alabes parlamentario di MEP) Arthur Vallejo.

Basta tempo andando

No ta for di awor, sino ta por lo menos dos aña caba cu otro dentistanan studia di Aruba ta canando un caminda di cruz pa DVG cu a permiti Kawaiah traha y pa AZV cu ta pag’e pa haci trabou ilegalmente, pa por pone un paro na e tendencia aki. A bay casonan den corte y na final a resulta cu berdad Abdalhadi Kawaiah no ta dispone di e diploma ni conocemento cu e ta pretende di tin. AZV a kibra relacion di trabou cu ne mientras cu Gobierno a cancela su licencia pa por opera como orthondontista.

E tabata taha

E dentista aki tin problema serio cu Inspeccion di Medicina na Aruba, IVA, cu a tah’e cu e no por practica mas. Asina mes, siman pasa a yega y sorprend’e cu polis na su consultorio. Tabatin ambtenaar di IVA tambe presente cu polis pa prepara e proces-verbaal y procesa e dentista pa motibo di ta eherciendo trabou ilegal na Aruba. A splic’e na mas cu un ocacion kico e mester haci pa regla su papelnan y su diplomanan y haci e trabou cu el a studia p’e y no eherce locual e no ta capas ni prepara pa practica.

Keho oficial

Dos aña pasa e conocido dentista Hendrik Marsman a dirigi un carta oficial na Aruba Dental Society, na IVA y na AZV, cuestionando ken of con ta controla e veracidad di diploma y experiencia di supuesto odontologonan cu ta bin establece na Aruba. Ta core duna nan permiso pa practica, compitiendo contra dentista yiu di tera, sin cu e stranhero tin e preparacion cu e ta pretende di tin. Tampoco ta controla si a yega di keha nan, castiga nan y persigui nan pa erornan grave den nan trabou.

Dentista no ta un specialista

E tempo ey Hendrik Marsman a cuestiona veracidad di e preparacion di Abdalhadi Kawaiah, a practica como specialista na Aruba, siendo e no ta. A verifica cu Canada, unda supuestamente el a studia, cu a confirma cu e dentista di Algeria, cu a haci su estudio di bachelor di “tandheelkundige” a sigui un curso na Universidad di Toulouse Sabatier III (e ta menciona den su facebook postgraduate, no master) a drenta Aruba y logra registra su mes como specialista (orthodontist) y tin contract cu AZV y ta cobra Afl. 650.000,- pa aña y tambe na companianan di seguro particular cobrando tarifa di specialista.

Ta cuestiona con a controla su diploma

Pa haya un permiso di trabou na Aruba mester viseer bo diploma prome na DVG como dentista (LUT/MB) of como specialista medico (LUG) y despues bo por haya permiso pa practica medicina. Ta cua papel el a presenta na IVA pa viseer su diploma? A viseer of keda sin viseer su diploma? A haya tur e tuchtzaak uitspraak? Asina mes a lag’e traha na Aruba? Un caminda den gobierno a pifia cu no a actua y cera su praktijk y sac’e for di Aruba. Ken ta responsabel…asina dentista Hendrik Marsman a cuestiona.

E diferencia entre dentista, kaakchirurg y ortodontista

Pa esunnan cu no sa e diferencia den tandarts, kaakchirurg y orthodontista, aki un splicacion:

Un estudio pa tandarts na Hulanda bo mester a caba VWO y 5 aña di estudio. Bo ta haya bo bachelor despues di 2 aña y master despues di 3 aña (drs) cu e titulo di tandarts. Na Sur America tin diferente colegio y universidad y bo por drenta cu MAVO of HAVO of VWO y despues di 4 aña bo tin bo bachelor. Cu esaki bo por pasa examen na Aruba (tin 5 aña no tin examen) y bo ta haya e titulo di “tandheelkundige”. Esaki no ta duna bo derecho riba e titulo di tandarts, cu ta solamente pa Drs. Tandheelkunde di Hulanda.

Pa specialista nos ley conoce solamente 2 variante;
  1. Kaakchirurg cu ta na Hulanda y Europa ta encera 6 aña medicina, despues cu bo a caba dentista y mas 4 aña kaakchirurg y wetenschappelijk onderzoek. Pues un kaakchirurg ta un dentista (6 aña), un dokter (6 aña) 2-3 aña wetenschappelijk onderzoek y promoveer (PHD) mas 4 aña opleiding kaakchirurg.
  2. Ortodontista: Bo ta haci despues di 6 aña dentista, 2-3 aña wetenschappelijk onderzoek y promoveer (PHD)y start estudio di 4 aña como orthodontist. E ora bo tin e titulo y bo ta master den orthodontics. Dentista por haci (postgraduate) curso di beugel di 1-2 aña pa siña traha cu beugel, mescos cu implante, sigui cursonan tur aña etc. Esaki no ta haci un dentista un kaakchirurg of orthodontist!
Caso na Canada y na Aruba

Na Canada e dentista aki a hay’e cu diferente caso na tuchtcollege y a perde 2 caso den hogerberoep, confirmando e casonan. Parce cu e lo a comete fraude, door di falsifica firma di pashent, haya reprimande pa presenta como ortodontista (locual e no ta) y despues di a perde e hoger beroep na aña 2016, el a bin traha na Aruba cerca dentista Walker cu contract di AZV. Despues di 3-4 luna dentista Walker a stop e di traha na su clinica door di su prestacion clinico.

Na Aruba parse ta tin 3 keho contra di dje y un a bay tucht college y resulta den un tuchtuitspraak contra dje. Na Canada e tabatin den un solo caso 17 encargo contra dje cu boetnan halto (riba 10 mil dollar) y a suspend’e durante 4 luna. Den e veredicto ta mustra cu e no tin spijt/remorse di su actonan y ta gañado. Na Aruba ta presenta su mes como ortodontista y tambe tin un scol di “orthodontics”.

Investigacion penal

Ta parce cu, despues di basta esfuerso pa canalisa e proceso via IVA y canal administrativo sin exito, cu awor porfin IVA a dicidi di tuma e caminda penal. Cu esey a entrega keho na Ministerio Publico pasobra ni cu a kita su licencia, a corta su contract cu AZV, cu toch e dentista ta sigui burla di nos leynan y ta sigui practica manera nad’un pasa. 

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.