ORANJESTAD – Entrante 12 di diaranson merdia, Aruba ta bou di codigo cora, cu ta e codigo maximo den caso di emergencia pa Aruba. Y den cuadro di e yegada di e mal tempo, posibel tormenta tropical, esaki tabata necesario. Asina prome minister Evelyn Wever a informa durante un conferencia di prensa extraordinario diaranson mainta.
KICO E KIER MEN
Entre e medidanan cu a decretal, ta cu pa merdia 12’or, establecimentonan no esencial y departamentonan di gobierno lo mester cera. Pa 2’or, establecimentonan esencial tambe mester cera. Ta trata di botica, supermercado y tienda di hardware. Transporte publico ta stop di core pa 3 or di atardi y pa 6’or di atardi, Shelter in Place ta drenta na vigor y ta keda valido pa 12 ora te cu 6’or di diahuebs mainta. Tin posibilidad cu por alarga e orario, dependiendo di e situacion di tempo.
