ORANJESTAD – Aunke cu e situacion di tempo no ta mustra mes pisa cu a premira, gobierno ta mantene e Shelter in Place toch pa awe diaranson atardi 6pm, te cu diahuebs mainta 6am. Loke si a dicidi diferente, ta cu ta definitivo cu no ta prolonga e Shelter in Place y ta pone cu Aruba por ‘bolbe’ na normalidad atrobe entrante diahuebs mainta. Esaki ta conta sigur pa comercio primordialmente. Asina prome minister Evelyn Wever Croes a bisa diaranson atardi 5’or durante un conferencia di prensa actualisa riba e tema di mal tempo. A duna un splicacion di e situacion di tempo y ta mustra cu ta solamente awacero y poco strena cu lamper lo haya y cu pa 10’or awe nochi caba, e pior lo mester a pasa.
CRITICA
A bin mesora critica cu pakico ta mantene e Shelter in Place, si ta solamente un tormenta esaki ta bira y cu e ta crea un precedente pa futuro. Ademas cu si tin base legal pa mantene un Shelter in Place siendo cu no tin menasa di calamidad mas, y cu ta simplemente un mal tempo ta spera nos y nada mas. Den e dianan nos dilanti esaki lo bira sigur un tema di discusion pa tene cuenta cu ne.
PASADO
Sinembargo, di otro banda por corda con den pasado, a kere cu tur cos a slek, luga a bin mal tempo despues inespera, gara tur hende di sorpresa, cu tur consecuencia. Cu e pensamento aki posiblemente a opta pa mantene e Shelter in Place toch, te cu mayan mainta.
