Cualkier persona cu a yega di sigui un tratamento di ley den Parlamento mi ta sigur cu lo keda decepciona y confundi. Decepciona pa e nivel y calidad di discusion y confundi pasobra mayoria di loke e coalicion MEP-RAIZ y e ministernan a papia no ta relata na e ley of tema den discusion. .
Parlamentario ta haya e oportunidad di haci pregunta y comentario na e minister presente. E parlamentario den su cas ta haya tempo limita pa haci su preguntanan y expone su ponencianan pero e ministernan ta haya tempo ilimita pa bagatalisa e parlamentarionan cu ta tribi di cuestiona e gobernantenan y nan maneho.
E tactica aplica no ta nada nobo y tin un nomber esta “ad hominem”.
Ad hominem ta ora bo dirigi bo atake directamente na e persona na luga di responde na su argumento. E meta ta pa desbarata e persona su caracter cu e speransa cu ta debilita of nulifica su argumento. Door di pone e enfoke riba e persona y trata na bagatilisa su caracter ta kita e atencion di e tema- y argumentonan.
Mas tristo den tur esaki ta cu nos tin presidente di parlamento cu ta yena su boca cu cambio y hisa nivel di Parlamento pero ta permiti tipo di drama asina tuma luga den sala di parlamento. Pueblo kier sigui e discusionnan den Parlamento pero ta hopi dificil pa keda conecta ora e nivel di discusion ta abou. Coalicion MEP-RAIZ ta haci Parlamento e cas di pueblo un berguensa. Supuestamente Parlamento t’ey pa controla gobierno y representa e pueblo, pero no tin transparencia y e parlamentario su derecho di haya inzage ta limita door di e mesun gobierno cu nan tin cu controla.
E Parlamentarionan cada biaha ta perde un oportunidad pa informa y educa pueblo di e consecuencia y/of beneficio di e leynan cu ta tratando. Na final di cada sesion, pueblo ta keda ta cu un dolor di cabes di ken a haci kico cuanto aña pasa y ken ta mas ladron cu ken.
“Divide and conquer” ta e strategia di MEP/Raiz. Semper ta pone un grupo contra otro pa asina nan logra nan meta. Permiti mi duna algun ehempel:
1.Durante pandemia a kita 12.6% di e trahadonan di gobierno, di compania estatal y fundacion. Gobierno a pone sector priva contra sector publico bisando cu 35.000 trahado no por sufri pa 5.000 trahado.
2.Ultimo siman, nan a pone henter pueblo contra e trahadonan den top di algun empresa. Minister -president a bisa cu 10 pa 20 trahado, nan supuesto salario halto ta stroba 5.000 ambtenaar di haya 5% di e 12.6% bek.
E prome dos medida MEP y Raiz a pasa sin considera e dolor cu ta causa na e trahado. E di tres medida contra clase trahado ta na caminda. Mi ta ansioso pa sa cua ta e gruponan cu MEP/Raiz lo pone contra otro ora di trata e di tres medida cu ta flexibilisacion di e leynan laboral.
