fbpx
August 15, 2022

Gobierno ta desaproba e tarifa y ta manda Web, Elmar y Utilities bek na mesa pa trece un tarifa mas social

Share on facebook
Share on Facebook
Share on whatsapp
Share on Whatsapp
0
0
Gobierno ta desaproba e tarifa y ta manda Web, Elmar y Utilities bek na mesa pa trece un tarifa mas social
Gobierno ta desaproba e tarifa y ta manda Web, Elmar y Utilities bek na mesa pa trece un tarifa mas social


Recientemente pueblo a wordo informa a traves di comunicado di WEB cu tarifa di awa lo aumenta, pa cual Minister encarga cu Energia Glenbert Croes a informa durante cu ta rechasa e decision aki. Como accionista di Utilities y Utilities como accionista di WEB mester suspende e decision ey cu a wordo tuma y e anuncio cu a wordo haci. Teniendo na cuenta cu ya caba costo di bida ta demasiado halto y awa y coriente ta necesidadnan basico.

Minister Croes a splica cu pa 7 luna largo (desde cu e hedging a termina) a pidi WEB y Elmar pa pa nan absorba e impacto di e aumento di prijs. Alabes ta compronde cu awor aki nan ta den un situacion super dificil y nan no por keda absorba esaki mas. Awo e pregunta ta, si ta bay aumenta prijs di awa y coriente, con ta bay haci esaki y den ki forma lo haci esaki.

“Fin di añanan ‘90, mi mes tabata e minister encarga cu utilidad y e tempo ey nos a bin cu e structura di tarifa cu tin te dia di awe. E structura ta encera cu esun cu ta haci uzo di tiki awa ta paga menos pasobra e ta uza menos. Pues e structura ta premia esun cu ta haci uzo di awa den forma consciente,” Minister Croes a splica.

Situacion precario di WEB y Elmar
Aworaki ta den un situacion cu ta compronde e situacion precario di WEB y Elmar pues ta compronde cu un aumento mester bin. Pero, esaki mester bin di tal forma cu esnan cu ‘schouder hancho’ lo tin cu paga mas, y mester tene cuenta cu e situacion di e grupo cu no tin.
Pa locual e structura di tarifa, tambe mester tene cuenta cu situacionnan unda cu por ehempel algun famia a bay biba hunto pa motibo di necesidad. Den e casonan aki, si mira solamente nan consumo/uzo esaki por crea e impresion cu ta un famia cu por paga mas. Mientras cu e realidad ta, cu ta pa necesidad nan ta biba hunto y no por sobrevivi riba nan mes. Minister Croes a splica cu teniendo e tipo di situacionnan aki na cuenta, Departamento di Asuntonan Social (DAS) mester wordo involucra (a dialoga cu e Minister encarga). Asina lo evita cu e tipo di casonan aki ta cay den un structura di tarifa sin cu ta tene cuenta cu nan situacion social. DAS lo mester haci un ‘intake’, verifica y constata e situacion social, pa despues referi e casonan aki na WEB y Elmar pa nan por cay den un categoria di structura di tarifa socialmente husto.

Minister Croes a confirma cu Ministerio encarga cu Energia, Ministerio encarga cu Economia hunto cu Utilities, WEB, Elmar y diferente departamento, ta trahando hunto pa mira con por traduci e aumento cu mester bin, den e forma di mas husto.

Hecho ta cu energia alternativa ta fundamental, y pesey ta importante pa e proyecto di Eagle LNG no tin retraso, Minister Croes a enfatisa.

Concluyendo Minister Croes a bisa, cu tin speransa cu e expertonan ta keda cla otro siman, pa e ora ey por haci e anuncio. Ta reconoce cu no por pone futuro di nos empresanan estatal WEB, Elmar y Utilities na peliger. P’esey e enfasis ta keda riba con lo introduci e aumento di tarifa, teniendo cuenta pa e ta socialmente husto. “E ta un decision cu ningun hende kier tuma, pero e decision aki mester wordo tuma na interes general cual ta inclui interes di e empresanan tambe”, Minister Croes a terminda bisando.

 

Share on facebook
Share on Facebook
Share on whatsapp
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.