fbpx
October 01, 2022

Minister Xiomara Maduro: Resultado positivo di CFATF ta un logro importante pa Aruba

Share on Facebook
Share on Whatsapp
0
0
Minister Xiomara Maduro: Resultado positivo di CFATF ta un logro importante pa Aruba
Minister Xiomara Maduro: Resultado positivo di CFATF ta un logro importante pa Aruba


Gobierno di Aruba tin hopi motibo pa duna cobertura amplio na e resultado positivo cu nos pais a caba di haya cerca Caribbean Financial Action Task Force (CFAFT) riba tereno di prevencion y labamento di placa. Aruba ta score na di dos luga den Caribe cu un resultado excelente di e evaluacion di CFAFT, demostrando Aruba su compromiso pa mantene e integridad di nos sistema financiero na halto. Nos pais ta un di e tres paisnan na mundo, banda di Spaña y Vaticano, cu a score halto riba e tereno di supervision. Tur esaki ta noticia imporante pa Aruba cu ta manda un señal fuerte na inversionista y ta sigura cu Aruba por keda conecta cu e mundo financiero via di ‘correspondent banking.’ Sinembargo oposicion lamentablemente ta bolbe mustra nan mala fe y ta buscando tur manera pa pone luz negativo riba e logro nacional aki. Oponente politico no mester kibra e logro grandi aki basa riba profesionalismo local.

RECONOCE TRABOU DURO DI ARUBA SU PROFESIONALNAN

Di banda di Gobierno, Minister Maduro ta reconoce e dedicacion y trabao duro cu Aruba su profesionalnan cu ta traha den diferente departamento di Gobierno y semi-publico, a haci pa awe Aruba por a score internacionalmente cu un bon resultado di evaluacion di CFATF. Minister Maduro ta reconoce tambe e compromiso di e profesionalnan den sector priva cu a aporta grandemente na e exito di Aruba den e evaluacion di CFATF. Danki na sector priva cu ta raporta e transaccionan inusual pa nan wordo analisa y investiga, Aruba por a mustra CFATF y mundo cu nos pais su sistema pa preveni y combati labamento di placa y financiamento di terorismo ta uno efectivo. Un evaluacion di CFATF ta exigi hopi esfuerso, conocemento grandi y bon cooperacion entre Gobierno, sector semi-publico y sector priva. Cada critica infunda di oposicion, ta bagatalisa e esfuerso grandi aki di Aruba su profesionalnan pa logra un resultado asina positivo pa Aruba. Ta hendenan bon studia y motiva a traha pa awe Aruba por a briya internacionalmente, p’esey e luz negativo cu oposicion kier pone riba nan trabou ta di hopi mala fe. Oposicion no mester falta respet na Aruba su profesionalnan cu a laga nos pais briya internacionalmente.

MANDA SEÑAL CORECTO PA SECTOR PRIVA

Un otro motibo pa comparti e resultado positivo aki di evaluacion positivo di Aruba pa CFATF, ta pa afirma n’e inversionistanan local y internacional cu Aruba ta un pais serio na unda nos sistema financiero ta cumpli grandemente cu e standardnan internacional di integridad financiero. Tin hopi inversionista serio cu ta buscando hurisdiccion cu bon reputacion financiero pa por inicia nan proyecto. P’esey ta importante cu e resultado di e evaluacion postivo di Aruba pa CFATF ta comparti den un forma cu e ta yega tur caminda pa promove nos pais. Oposicion tambe mester asumi nan responsabilidad na bienestar di Aruba y percura pa manda e señal corecto pa sector priva y no bay haci politikeria cu ta perhudica con mundo ta pensa di Aruba.

LAGA ARUBA CELEBRA E LOGRO POSITIVO DI ESFUERSO GRANDI

E resultado excelente di evaluacion di Aruba door di CFATF, ta un logro grandi pa nos pais cu mester ricibi un cobertura amplio. Ta un esfuerso a haci pa ful un pais y cu tin beneficio grandi pa Aruba. Oponente politico no mester bay destrui e momento aki pa Aruba cu critica sin base riba Aruba su profesional-, departamentonan publico, semi-publico y sector priva. E evaluacion positivo di CFATF no ta topico pa hiba discurso pa fomenta discordia y di falta respet na nos departamentonan publico of pa instiga pueblo pa yama nos minister-president pa gañado. Brinda espacio pa Aruba su profesionalnan haya reconocemento pa nan esfuerso grandi na bienestar di Aruba. Pone un paro na e strategia politico di ripiti cu Gobierno ta gaña, pasobra pueblo tin e “door en door” caba y no por wordo manipula. Un resultado concreto manera un evaluacion di CFATF cu un resultado excelente pa Aruba ta papia pa su mes y ta un logro nacional cu mester conta cu e debido respet y apoyo di oponentenan politico tambe.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.