Dialuna e prome grupo di studiante a sali rumbo pa madre patria Hulanda, pa asina continua cu nan estudionan superior.
Un di e studiantenan aki ta Valerie Sanglay cu a sali pa Leeuwarden, pa asina continua cu su estudio na NHL Stenden Hogeschool, den e richting di Hospitality. Esaki ta un estudio cu lo dura cuater aña.
Un otro studiante cu dialuna a subi avion y sigui su soño pa ta Brishen Risco cu a bay studia Electrical Engineer na Arnhem. Un estudio di cuater aña di duracion. El a bay EPI richting Electrotechniek, y awo cu el a cab’e e ta bay sigui cu su estudio superior na Hulanda.
Justin Iles a scoge pa sigui su estudio superior na Hulanda. El a indica cu el a cuminsa EPI, richting Bouwkunde, pero e no a gusta e estudio, pa cual el a kita y bay traha, pa cera su cen p’e bay Hulanda.
Isaac Geerman tambe tabata forma parti di e studiantenan cu a bay Hulanda pa asina sigui nan estudio superior. Geerman ta bayendo Arhem, unda cu e lo studia Electrical & Electronical Engineering.
Hopi di e hobennan cu awe a bandona nos isla en busca di un miho futuro na madre patria, a indica cu nan lo bolbe bek ora cu nan caba cu nan estudio. Esey ta te cu aworaki, pero tur cos ta depende si nan gusta, e ora nan lo keda y forma un biba ayabounan.
Haya sa mas di e studiantenan aki y mucho mas den bo matutino digital TREMPAN.
