fbpx
October 01, 2022

Prepara e tera pa bo bendicion

Share on Facebook
Share on Whatsapp
0
0
Prepara e tera pa bo bendicion
Prepara e tera pa bo bendicion


Stop di adora preocupacion y cuminsa adora Dios. Ta hopi noticia ta core rond y ta hopi hende ta papia, y awor mas cu nunca a yega e tempo di pone nos fe den Dios, biba den obedencia, pa asina nos por sirbi Dios, y stima nos prohimo.Tur cos nos por den Cristo cu ta nos fortalesa.

Señor a duna nos un promesa den 1 Corintionan 2 vers 10; Manera ta para skirbi: Cosnan cu wowo no a mira ni horea no atende, ni a drenta den curason di hende, tur loke Dios a prepara pa esnan cu ta stim’e. E dianan por ta dificil, pero e palabra di Dios ta keda mesun cos, pasobra den e momento di secura, Dios ta bendiciona su pueblo.Dios su tempo ta perfecto.

Nos mester mantene nos bista riba Dios for di unda nos yudansa ta bini. Nos mester consulta cu Dios den tur cos, y tur cos lo sali bon, pa evita cu nos ta cay den stress y depresion, pasobra no lubida cu e enemigo ta cana manera un leon rugiente buscando ken e ta devora.

P’esey awor mas cu nunca nos mester haci oracion cu un curason limpi y honesto na Dios.

Nos mester lesa e palabra di Dios cu un curason habri, y aplica e palabra di Dios den nos bida.

Nos no por tene na palabra di hende pero nos mester gara na e palabra di Dios, pasobra e palabra di Dios ta trece fe, confiansa y paz.( Isaias 26:3-4).

Nos mester hala mas serca Dios ( Santiago4:8) y Dios lo hala serca nos,aserca Dios cu un curazon, puro  pasobra asina nos lo scucha Su bos ( Juan 10:4), pasobra su carnenan conoce su bos.

Ora nos hala serca Dios nos ta ricibi sabiduria spiritual, nos lo ricibi sabiduria divino , un Spirito extraordinario ( Daniel 6:3) pa nos por ta un guia pa nos famia den e temponan dificil aki.

Salmo 119 vers 98-100 ta bisa: Bo mandamentonan ta haci mi bira mas sabi, cu mi enemigonan, pasobra semper nan ta cu mi. Mi tin mas comprendemento cu mi siñadornan, pasobra bo testimonio ta mi meditacion.

P’esey e palabra di Dios ta bisa; Entrega awo y keda na paz awo, door di esey bondad lo bini pa bo, por fabor acepta instruccion for di Su boca y warda Su palabranan den bo curason.(Job 22:21+22)

Ta ken ta e hende cu ta teme Señor, E lo instruie den e caminda cu e mester cana, su alma lo biba den prosperidad, y su desendientenan lo hereda e tera.( Salmo 25:12+13).

Awor ta e tempo cu mas cu nunca tur famia mester ta mas uni posibel, pasobra caminda tin union Dios ta manda su bendicion. Un Famia uni por para contra tur forsa di maldad, y sali vencedor, nos mester tin Dios na prome lugar den nos bida, pasobra E ta nos refugio y fortalesa.

No preocupa pa nada , pero den tur cos pa medio di oracion y suplica cu gradicimento, laga boso peticionanan ta conoci dilanti di Dios. Y e pas di Dios cu ta surpasa tur comprondemento,lo warda boso curason y boso mente den Cristo Hesus.(Filipensenan 4:6+7).

Laga nos pone Señor semper nos dilanti, no laga nos envidia e orguyoso y e arogantenan, pasobra Dios ta stima hende humilde y Dios ta scucha nan bos, y ta atende nan peticion.

Ban pidi Dios pa su Spirito Santo guia nos den tur cos.

Dios tene misericordia.

Sinceramente, pastor Marcel Balootje.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.