ORANJESTAD – Banco Central di Aruba (BCA) a conclui e encuesta di percepcion di negoshi pa e di segundo trimester di 2022. E encuesta di percepcion di negoshi ta evalua e percepcion economico di e negoshinan local. Durante e segundo trimester di 2022, e asina yama ‘Business Perception Index’, cu ta consisti di e indicenan di condicionnan economico actual y condicionnan economico a corto plaso, a mengua cu 3,3 punto di indice te na 104,6 cual ta refleha confiansa di negoshinan menos optimista (Grafiek 1) . E cambio den den e percepcion di negoshinan ta debi na un caida den tanto condicionnan economico actual y a corto plaso.
Fuente: Banco Central di Aruba
E indice di condicionnan economico actual a reduci cu 1,7 punto di indice te na 105,2 compara cu 106,9 den e di promer trimester di 2022. E indice di condicionnan economico a corto plaso a registra un bahada di 5,4 punto di indice, esta for di 109,1 den e di promer trimester di 2022 te na 103,7 den e di segundo trimester di 2022 (Grafiek 2). E porcentahe di encuestadornan cu ta premira un crecemento economico positivo den e siguiente 12 lunanan a nota un reduccion di 15,4 punto di indice te na 34,6 porciento.
E informe completo di e encuesta di percepcion di negoshi ta disponibel riba website di BCA (https://www.cbaruba.org/).
Grafiek 2: Condicion Economico actual y Condicion Economico a corto plazo
Fuente: Banco Central di Aruba
