fbpx
December 08, 2022

Kooyman a celebra 40 aña di servicio di Sharon Pantophlet

Share on Facebook
Share on Whatsapp
0
0
Kooyman a celebra 40 aña di servicio di Sharon Pantophlet
Kooyman a celebra 40 aña di servicio di Sharon Pantophlet


Kooyman a celebra 40 aña di servicio di Sharon Pantophlet. Den un ambiente ameno empleado como famia a bini hunto pa celebra e momento special aki. Pa famia di Kooyman, Sharon Pantophlet ta e mentor y trainer.

Juri Kooyman, gerente general di Kooyman, a hiba palabra durante e celebracion. Aki el a conta tur presente un tiki di Sharon, kende a sa di mira hopi gerente durante cuater decada. Kooyman a felicit’e pa su 40 aña di servicio y a splica cu Sharon a pasa den diferente reorganisacion. E tabata den tempo bon y malo. Un cos cu Kooyman ta corda ora el a cuminsa traha cu Sharon, e tabata spant’e. Pasobra cos mester a bay su manera of no, specialmente ora di drenta Dakota. Pero despues di a cuminsa conoce mas, el a ripara cu su prome impresion di Sharon tabata fout.

Aki el a realisa cu Sharon ta e persona cu tin e cultura dje compania, historia, e normanan di reglanan no skirbi. E rol di Sharon aki na Aruba a bira e modelo pa tur office manager di MegaStore den Kooyman. Segun Kooyman, Sharon ta e mentor y trainer pa hopi, y e siguiente office manager. Juri Kooyman a expresa su gratitud p’e tempo cu e ta traha cu Sharon. Den nomber di directiva y famia, el a gradici Sharon pa su añanan di servicio y ta leal n’e compania.

Sharon Pantophlet, office manager di Kooyman, a expresa cu cuarenta aña trahando eynan a bay tremendo. Cuarenta ta basta aña y el a pasa door di diferente manager y director. El a cuminsa dia 3 di augustus 1982 cu tabata tempo di Steenhuizen. Di eynan el a traha cu como shete director, pero awo tin Frank Heitkönig como su manager di tienda. Antes e nomber tabata Antiliaanse Handel, despues a cambia pa Antillen N.V. y awo e ta Kooyman. Trahando cuarenta aña eynan, e no tin nada di keha y el a bay bon cu tur hefe y colega. E ta haya cu su añanan di servicio trahando cu Kooyman tabata uno tremendo. Awo cu e ta bay haci sesenta aña, e ultimo fase ta bale la pena y cu poder di Dios e bay mesun bon.

Den tur cos ora e ta prome biaha, bo tin un tiki nervio. El a pasa den diferente fase y e tempo ey tabatin mas trabou riba papel. Mas hopi cu e por a haci tabata manda un fax, copy y telmachine pa conta. Despues a bin mas trahamento riba computer, trahamento online y hopi di e papeleonan no tin mas. Sharon a sa di cambia cu tempo pa locual e trabou ta exigi di su persona. P’esey cu honor e por gradici y celebra su 40 aña.

Sharon a pasa den e epoca di ceramento di Coastal, Valero, tur turbulencia, despues Kooyman a centralisa cu mayoria trabou administrativo a bay n’e oficina principal. Tur e cambionan di compania el a pasa aden y a sa di sobrevivi nan.

Semper ta bon pa sigui y volg bo mes, siña mas hopi cu por, tuma training, curso cu por yuda bo mes pa bay dilanti. Tempo ta cambia y e tipo di trabou tambe ta cambiando, y ta exigi mas di bo tambe. El a conseha pa haci uzo di bo talento y no hunga Fortnite y Playstation, pero purba online mes siña mas cu por. Tambe pa keda mira kico tur ta e cambionan cu ta exigi di bo pa ta prepara pa nan. El a indica cu si bo ta prepara p’e cambionan, e ta bay mas facil.

Sharon a bisa cu cuarenta aña p’e ta un honor di a trata e compania, pa tur e chensnan cu el a haya pa sigui y volg cu e compania, p’asina e por a keda bij cu tur e cambionan cu tin. E ta hopi contento cu esey. Cuarenta aña ta basta aña y manera tur manager a sa di aprecia su persona, e tambe a sa di aprecia nan. “Semper nos ta den bon relacion. Danki p’e 40 aña cu mi por a traha cu e compania aki”, el a expresa. E sa cu e compania lo sigui bay den e exito cu e tin. E ta un compania di famia, pasobra ta tene cuenta cu famia dje trahadonan y ta cla pa yuda nan den ki forma. Sharon ta spera cu e por sigui evoluciona y duna mas hende e chens pa haya mas empleado. P’e doño- y trahadonan sigui florece.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.