Tabata diamars ultimo pa mas o menos 8:00 pm cu bida di Fichi y Glenda Tromp-Geerman a cambia por completo. Ambos pensionado di gobierno, gosando di bida cu nan tres yiunan y nietonan, a confronta e realidad cu di un rato pa otro nan ta multimiyonario. Glenda ta sinti cu su fe den Dios y su oracion a yud’e gana e premio aki, pasobra el a pidi Señor pa dun’e un man pa e por caba su mision como mama. ta algo cu e ta pidi pa hopi aña y cu ta den su curason. Awe el a presenta cu su casa Fichi y nan nietonan pa reclama e premio na oficina di Lotto di Aruba.
Glenda Tromp-Geerman di 70 aña di edad a cumpra su ticket y e numbernan ta vast na su ruman na Hary’s Lottery situa den Shaba Pastry. El a inverti su shete florin y desde awe el a rend’e na 3.3 miyon florin cash, sin paga impuesto ni nada. Glenda a bira e di dos miyonario di Aruba cu Lotto pa aña 2022 y awe a bishita oficina principal di Lotto pa cobra su premio di 3.3 miyon florin. Glenda tabata super contento y a conta cu awo e lo por cumpli cu un di su deseonan como mama.
Fichi a traha como polis hopi aña te cu el a baha cu pensioen, mientras cu su casa Glenda a traha hopi aña tambe na Reclasering te cu el a baha cu pensioen. Nan ta tata y mama di Patrick, Alexis y Daisy. Fichi mes ta yiu di e conocida señora Titi Tromp, un berdadero baluarte di e pueblo di Noord.
E numbernan ganado tabata 15-03-04-09 y MegaBall 05. E premio di 3.3 miyon florin ta e di dos premio mas grandi den historia di Lotto pa Deporte. Esun mas grandi tabata 3.7 miyon florin. Di berdad cu, durante e trayecto di Lotto di Aruba, varios premio miyonario a cay den e districto di Noord. Por bisa cu definitivamente Noord ta un districto bendiciona y cu hopi suerte. Pabien na famia Tromp-Geerman cu e tremendo premio aki, cu sin duda…ta cambia nan bida por completo.
