Pa medio di e sanger di Cristo Hesus nos a haya redencion, pordon di pica, relacion cu Dios, proteccion y autoridad riba tur demoño den nomber di Cristo Hesus.(Efesionan 1:5-9).
Ora un persona entrega su bida na Cristo inmediatamente, e ta wordo redimi of mihor bisa cumpra cu e sanger di Hesus for di reino di scuridad y e enemigo ya no tin poder mas riba dje.
Awor esey tur hende tin cu compronde dicon e enemigo ta bringa asina hopi pa un persona no entrega su bida na Cristo Hesus, pero pa e keda mara of esclavisa den e mundo di idolatria, inmoralidad y pica.
Tin biaha e diabel ta uza esunnan cu ta mas yega na abo pa nan desconseha bo pa no entrega bo bida na Señor y asina desobedece Su palabra (Juan 3:16-21).
Awe hopi hende su wowo lo habri, pa nan realisa cu nan mester entrega nan bida na Cristo Hesus:
P’esey no tin condenacion pa esnan cu ta den Cristo Hesus. (Romanos capitulo 8: 1-2)
Ningun arma cu wordo forma contra bo lo no prospera, y tur lenga cu lanta contra bo den huzgamento lo bo condena, esaki ta e herencia di e sirbidonan di Señor y nan hustificacion ta bini for di mi, Señor ta declara Dios. (Isaias 54:17).
Ora nos entrega nos bida, na Hesus Cristo nos tin confiansa di por drenta e luga santo pa medio di e Sanger di Hesus. (Hebreonan 10:19-22) y esaki ta duna nos autoridad di por aplica e sanger di Cristo Hesus riba nos famia y tur locual nos tin.
Pasobra tin hopi hende cu pa falta di conocemento y idolatria ta hinca nan mes den cosnan cu nan no conoce y via di internet, whatsapp, y facebook e cos a bira mas facil pa drenta e mundo di scuridad.
Esaki tambe ta otro motibo pa depresion y problema cu salud mental.
Cuanto hende no ta cana bao di depresion door di un menasa di e mundo di scuridad pasobra nan no tin Cristo Hesus na prome luga den nan bida, ni tampoco nan sa cu e Sanger di Cristo tin poder.
Pa bo aplica e sanger di Cristo riba bo bida, bo mester tin un relacion intimo cu Cristo, y no un relacion manera bo kier , pasobra mescos cu Cristo a bisa cu Su carnenan ta conoce Su bos, asina tambe e diabel sa ken ta fiel na Dios.( Romanonan 5:8+9).(Job 1:9-10)
Si nos cana den luz mescos cu E ta cana den lus, nos tin comunion cu otro y e sanger di Hesus Su Yiu lo limpia nos di tur pica.( 1 Juan 1:7).
Nos no a wordo redemi cu cosnan cu ta parece, manera plata of oro di nos manera bano di biba manera nos antepasadonan, ma cu e sanger precioso como un lamchi sin defecto y sin macha. E sanger di Cristo.(1 Pedro 1:18+19).
Cuanto mas e sanger di Cristo, kende pa medio di e Spirito eterno, a ofrece su mes sin defecto na Dios, lo purifica boso consenshi di obranan morto pa sirbi e Dios bibo.( Hebreonan 9:14)
Ma awor den Cristo Hesus, boso kendenan antes tabata leu, a wordo treci cerca pa medio di e sanger di Cristo.(Efesionan 2:13)
E sanger di Cristo Hesus tin poder.
Diabel no tin poder si abo no dun’e poder den bo bida.
P’esey Dios kier pa nos pordona (Mateo 6:14-15), y no papia mentira (Proverbionan 6:16-19), pasobra esey ta porta habri pa e enemigo.
Sinceramente , Pastor Marcel Balootje.
