ORANJESTAD – Sindicato di Aduana Aruba (SADA), Sindicato di Empleado Publico y Priva (SEPPA), Sindicato di Maestro di Aruba (SIMAR), Sindicato di Polis (SPA) ySindicato Trahadonan Organisa Publico di Aruba (TOPA) a exigi pa Gobierno di Aruba paga e asina yama ‘reparatietoeslag’ cu nan tin derecho ariba, fin di luna di augustus awor, esta 2022. Nan argumento ta netamente e buelta positivo cu Gobierno mes ta ‘gabando’ awor con bon Aruba ta recuperando. Y como tal ta tempo pa e sindicatonan nan miembro beneficia di esaki tambe.
PAGO
E exigencia specifico ta cu pa riba salario di 23 di augustus 2022, e suma di AWG 1918,= ta poni como ‘reparatietoeslag. Y e pago aki por wordo hustifica cu presentacion di un prepuesto supletorio. Ademas, e sindicatonan ta bisa cu nan a tuma nota di e noticia di minister di finanza Xiomara Maduro, cu a reserva un suma di 18 miyon pa por a paga e 5% di e luna pasa, pa resto di e aña. “Esaki ta implica cu e restante, esta 10 miyon por wordo usa pa paga e resto di e 7.6% (di e total di 12.6%) den su totalidad.
SITUACION MIHO
E sindicatonan a usa e mesun informacion cu GObierno di Aruba mes a bin ta usa ultimo tempo, unda cu ta gaba con bon Aruba ta recuperando, y cu te hasta recientemente ATA a laga sa cu Aruba ta e di dos miho recupera di turismo y cu e situacion lo ta te hasta miho cu 2019. Pues cos sigur ta bayendo bon, manera cu Gobierno mes ta bisa. Sindicatonan ta interpreta esaki cu cos ta bon atrobe, y cu si cos ta bon berdad asina, anto no tin pakico mantene e situacion di retencion di salario y otro gastonan cu e miembronan tin derecho ariba. Cu esaki, a exigi di prome minister Evelyn Wever Croes, cu nan kier wak e suma di placa ey riba e salaris slip, fin di luna. No ta bisa kico lo pasa si nan no haya esaki paga. Por lesa e carta completo AKI. E potret ta di archivo di noticiacla.
