fbpx
October 02, 2022

El a bandona e sitio: Chauffeur a ranca pomp na CITGO Boulevard

Share on Facebook
Share on Whatsapp
0
0
El a bandona e sitio: Chauffeur a ranca pomp na CITGO Boulevard
El a bandona e sitio: Chauffeur a ranca pomp na CITGO Boulevard


Un caso basta serio a tuma luga na stacion di gasolin na Boulevard, na momento cu un chauffeur a haci un maniobra incomprendibel, a subi y ranca un di e pompnan causando daño grandi na esaki.

Un peliger eminente ta locual esaki a pone riba tur cu tabata presente e momento ey na e stacion di gasolin. No solamente cliente pero tambe empleado cu mester a core pa asina evita lo peor.

Auto a ranca pomp na Citgo Boulevard

Posted by 24ora on Friday, August 12, 2022

Gasolin tabata core y por a causa un desgracia eybou.

Locual cu a sorprende tur hende ta e echo cu e chauffeur a sali di su vehiculo y bandona e sitio. El a baha na awa!

Mesora e personal di CITGO a drenta den accion, a cera e pomp afecta pa asina stop e fluho di gasolin cu tabata core afo y tambe a cera e area pa asina evita cu mas auto lo por yega cerca. A paralisa tur servicio mirando e seriedad di e situacion. Polis tambe a presenta pa asina tuma tur dato.

A menciona tambe cu un incidente asina aki no a yega di tuma luga nunca antes, esaki ta prome biaha cu ta ranca e mashin completo. A yega di sosode cu ta ranca e slang of dal den dje pero nunca cu un vehiculo ta ranc’e bay cu ne dje forma aki.

Brandweer riba stand by pa saca auto cu a dal den pomp di Citgo Boulevard

Brandweer riba stand by pa saca auto cu a dal den pomp di Citgo Boulevard

Posted by 24ora on Friday, August 12, 2022

E suceso aki a tuma luga aproximadamente 3:45 pm y a mobilisa tur hende concerni pa asina atende cu e situacion cu tabata uno peligroso. E pomp afecta ta situa na e banda mas pazuid di e stacion di gasolin. Algun ora sigur lo tuma pa asina reestablece servicio na e stacion aki y sigura cu tur cos lo ta na ordo prome cu cuminsa laga cliente yega bek eynan.

Algun rato despues, personal di brandweer a presenta tambe na e sitio. A controla cu tur protocol di siguridad ta implementa pa asina nan por a move e vehiculo y transporte cu takelwagen pa warda di polis. A basha foam tanto riba e area como riba e vehiculonan envolvi como parti preventivo. Ademas di e pomp, tambe a registra daño na un otro vehiculo cu tabata para na e otro banda di e pomp.

Un buskeda a cuminsa pa e persona cu a ocasiona tur e desaster aki. A duna descripcion cu e persona masculino, pelon di haltura mediano y cu un uniform di un hotel den su man, ta asumi cu lo ta su uniform di trabou. El a bandona sitio direccion Paardenbaai te caminda cu nan por a mir’e.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.