fbpx
October 02, 2022

Partido RED: Gobierno mester interveni den Arugas

Share on Facebook
Share on Whatsapp
0
0
Partido RED: Gobierno mester interveni den Arugas
Partido RED: Gobierno mester interveni den Arugas


Otro topico cu partido RED Democratico a presenta diaranson mainta den nan conferencia di prensa, ta e maneho di prijs pa boter di gas di parti di Arugas. Miembro di e partido, Ricardo Croes a bisa cu actualmente tin un cantidad maximo di boter di gas pa residencia/pa aña y cu si ta surpasa esey, e prijs pa e siguiente boter di gas ta aumenta enormemente. 

E partido ta pidi pa gobierno interveni den esaki realisando cu e consumo di un famia awendia por ta mas cu antes y cu e aumento di prijs no ta hustifica. Si Arugas ta desea di controla si un cas ta haci uzo di gas pa meta comercial, tin otro manera di wak esey.

Arugas tin un tarifa pa gas di 46.38 florin pa boter y nan regla ta di seis boter di gas pa hogar pa aña. Asina cu bo pasa seis boter di gas, e boter di gas ta crece y bira 158.50 florin, mientras cu no tabatin gasto extra pa produci e boter di gas ey, segun Ricardo Croes.

“Te unda cu mi sa tin diferente prijs entre hogar, restaurant y hotel. Punto di partido RED Democratico ta cu e regla actual di Arugas no ta sirbi pa un hogar grandi, manera hopi awendia ta cu mayornan bibando hunto cu yiu y nieto. “Con bo ta haci si bo mester uza dryer pa seca bo paña?,” asina Croes ta puntra, bisando cu “entre e dryer cu e stoof, bo gas a caba. Anto e ora ey di ripiente bo tin cu paga 158.50.”

E partido ta considera cu e maneho aki ta un abuso y gobierno mester tuma carta den e asunto.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.