fbpx
October 02, 2022

Susto a lag’e cu debe di 70 mil florin

Share on Facebook
Share on Whatsapp
0
0
Susto a lag’e cu debe di 70 mil florin
Susto a lag’e cu debe di 70 mil florin


No tabata su intencion, esey ta locual Charles Ilavoes a declara den un entrevista exclusivo, despues di e desgracia na pomp di gasolin na Boulevard. E chauffeur envolvi den e accidente a regresa na e sitio despues di un rato.

El a conta cu despues di trabou el a dicidi di pasa busca poco gasolin. E ta corda di a paga e auto, pero cu su pia lo a cay riba e trot cu a haci cu el a dal tras di e vehiculo su dilanti, den un maniobra a bira e stuur pero a haci cu el a bay dal den e pomp.

Ilavous, cu ta e chauffeur cu a causa e accidente, a indica cu e no tabata intencional. El a bandona e sitio pasobra el a sinti cu e ta bay bira loco debi na locual cu a caba di pasa. Susto a pone cu el a sali bay for di eynan pero despues cu el a calma, a regresa pa asina cuminsa busca su pertencianan cu a keda atras. Den e susto a lubida su potmoni, cu ta locual tabata prome cos cu el a bin ta puntra p’e.

Mirando tur e gasto cu a keda atras y cu el a bandona sitio, ta di evalua seriamente kico tin cu bay tuma luga awo. Charles no tabata na altura cu a confisca su auto, ni tampoco den cuanto gasto e ta hinca awo. Locual e ta apela, ta pa yega na un areglo y asina paga poco poco mirando cu e tin famia y cos pa paga.

Locual e ta bay haci awo, ta tuma contacto cu polis pa mira kico ta e siguiente paso cu tin cu tuma.

Version di testigo riba e incidente

Na momento cu a dal den e pomp, na e otro banda tabatin un otro vehiculo staciona cu tambe tabata yenando gasolin. Chauffeur di dicho vehiculo, Shahayra de Cuba a conta cu normal esaki no ta su ruta ni e stacion cu e ta frecuenta pero mirando cu e tabata den pura y den e area a dicidi di para na Boulevard pa tank. E biaha aki el a bira un dia peculiar.

Shahayra  na e momento ey tabata para cu lomba pa e pomp y a scucha un zonido hopi duro su tras. Esey tabata momento cu a dal den e prome auto. A ripara cu e chauffeur no a para y a sigui bin full speed riba mi, ta locual Shahayra a conta.

E mester a bula y hala un banda. Si e no a hala e lo tabata benta eybou, den tur e gasolin.

E tabata un susto grandi! Segun De Cuba por a observa, na momento cu el a dal den e prome vehiculo, e tabata purba maniobra cu e stuur y segun e por a mira, cu intencion di hit and run. Pero pa su mala suerte e stuur a lock y a haci cu el a bay dal y ranca e pomp di gasolin.

Despues di a dal, el a piki tur pertenencia den auto y baha na awa. Afortunadamente nada mas grave no a pasa y Shahayra ta consciente y contento di esaki, pasobra e por tabata pio. Lo sigui bishita e stacion den futuro como no ta tabata nan fout di locual a tuma luga.

Ta papia di un suma di 70 mil florin pa cuminsa

Esaki ta algo cu prome biaha den historia a tuma luga. Humberto Acosta Operation Manager CITGO Boulevard no por corda cu antes algo asina aki a yega di sosode. Nunca ta premira un tipo di accidente aki tuma luga y awo tabata excepcional. Den careda di 3:00 PM a haya notificacion y mesora a activa e protocol indica na momento cu algo asina tuma luga. Por a tuma nota cu e personal di CITGO Boulevard a actua debidamente y activa e emergencia y asina lock tur pomp pa asina para e fluho di gasolin mesora, no solamente na e pomp afecta, pero na tur pomp e momento ey.

Ta agradecido cu tur personal tabata sa con pa actua y cu no a pasa na nada mas grave. E daño na e pomp si ta uno grandi. No ta mira cu e pomp aki lo por ta den servicio mas, e ta completamente destrui. Pa awo lo opera cu e resto di pomp cu nan tin. E gasto cu ta encera un pomp asina ta di aproximadamente 70 mil florin. Cu ta inclui e pomp nobo, transporte y instalacion.

Acosta no por compronde kico lo por a pasa den mente di e chauffeur, cu a piki su papelnan y sali bay. Naturalmente e caso aki ta den man di autoridad y investigacion lo saca afo kico por a pasa. Tambe el a indica cu e tin mas di 35 aña trahando y un incidente asina aki nunca a yega di tuma luga prome, locual cu hopi biaha sa pasa si ta cu un chauffeur ta sigui core cu e slang na e auto pero di e magnitud aki, nunca.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.