fbpx
December 08, 2022

Ta tempo pa curasha y motiva otro den Señor

Share on Facebook
Share on Whatsapp
+1
0
Ta tempo pa curasha y motiva otro den Señor
Ta tempo pa curasha y motiva otro den Señor


Tempo ta difcil, cos ta birando cada dia mas serio, palabra di Dios ta cumpliendo.

Si bo bisa un persona algo e ta cla pa bisa bo ta cos di misa,  ora bo papia cu hende pa entrega nan bida na Cristo, nan ta bira lomba pa bo, nan no ta interesa den esey, nan ta aparta for di bo, pasobra bo ta papia di Dios, hende no kier tende, ta prefera keda den scuridad y nan no kier e luz di Cristo den nan bida. (Juan 3:20+21)

Pero si tabatin un tempo cu nos mester curasha otro den Señor ta awor, pasobra tur hende ta mira cu  2 Timoteo 3:1-9 ta tuma luga y tur hende ta nota: 

Cu nos lucha no ta contra carni y sanger, pero contra e gobernantenan, contra e podernan, contra e forsanan mundial di e scuridad aki, contra e forsanan spiritual di maldad den e lugarnan celestial.(Efesionan 6:12) 

Ta for di unda nos ta kere cu tur virus y guera ta bini, tur esaki ta para skirbi pa nos curasha otro pa hala mas cerca Dios, ( Lucas 21 vers 32-36). Nos mester curasha y motiva otro pa haci oracion, nos altar cual ta nos curason mester ta yena cu bon pensamento, pa asina nos por comparti cu otro, no ta tempo di haci wega, ta tempo pa nos pensamentonan ta dirigi riba cosnan bon , puro y decente (Filipensenan 4;7)  pa asina e Dios di paz lo ta cu nos.

Nos mester apoya nos yiunan riba e bon caminda, y no tolera scuridad, ni tampoco inmoralidad drenta nan bida, ta tristo pa mira cuanto hoben ta muri prome cu nan tempo, pasobra nan a scoge e caminda di scuridad, esaki tambe mester  haci nos como mayor mas conciente di nos deber cu Dios a encomenda na nos.(Efesionan 6:4).

Hesus a bisa e cosnan aki, Mi a papia cu boso, pa den Mi boso por tin paz. Den mundo boso tin tribulacion, ma tene curashi, Mi a vence mundo. (Juan 16:33).

Señor ta spierta nos bisando: No tene miedo,pasobra Mi ta cu bo, no desmaya pasobra Mi ta bo Dios, Lo mi fortalece bo si, lo Mi yuda bo,si lo Mi sostene bo cu Mi man drechi di husticia.

Pasobra Ami ta Señor Bo Dios, kende ta sostene bo man drechi, kende ta bisabo, no tene miedo lo Mi yuda bo. ( Isaias 41:10+13).

E angel di Señor ta campa rond di esnan cu ta tem’E y ta rescata nan. Hende grandi ta bisa ora bo mira cas di bo bisiña na candela tira awa riba di bo.

Mientras cu nos ta mira con maldad ta avansa den mundo, ta tempo pa nos dobla  nos rudia na Dios, y pidi Dios sabiduria y revelacion di su palabra, con pa drenta mas den Su presencia, y con depende mas di Dios

Pasobra tur hende mester sa cu tur poder ta di Dios, y tur cos bon ta bini di Dios (Santiago 1;16-17).

Curashamento ta bini di Dios, descurashamento ta bini di diabel, kende ta yena hende su cabes cu stress y depresion, pesey nos como yiunan di Dios mester  curasha y motiva otro.

No laga ningun palabra dañino sali for di boso boca, sino solamente palabra cu ta bon pa edificacion,conforme e necesidad di e momento, pa esaki por duna gracia na esnan cu ta tende.

E ladron ta bini solamente pa horta, mata y destrui,Ami a bini pa nan tin bida, y pa nan tine na abundancia.(Juan 10:10).

Sinceramente, Pastor Marcel Balootje.

Share on Facebook
Share on Whatsapp
+1
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.