fbpx
January 28, 2023

DIMP: Cumplimento pa entrega declaracion di impuesto mester mehora

Share on Facebook
Share on Whatsapp
0
0
DIMP: Cumplimento pa entrega declaracion di impuesto mester mehora
DIMP: Cumplimento pa entrega declaracion di impuesto mester mehora
DIMP: Cumplimento pa entrega declaracion di impuesto mester mehora
Posted on 09/8/2022 9:37 am AST | Updated on 09/8/2022 9:43 am AST

ORANJESTAD – Departamento di Impuesto diahuebs mainta a subraya cu ‘cumplimento pa cu entregamento di declaracion di impuesto mester mehora’. Ultimo tempo e colegio di supervision pa Aruba, CAFt tabata mustra cu e cumplimento no ta bon y cu esaki mester drecha. Awe, DIMP ta subraya esaki tambe di nan mes via un comunicado. DIMP a sigura cu nan ta un departamento di gobierno cu tin e tarea pa garantisa entrada di impuesto y pa facilita e contribuyente pa por cumpli cu su debernan fiscal. Responsabilidad fiscal ta encera entregamento di declaracion y haci e pago corespondiente na tempo.

 E cumplimento (of “compliance”) cu entrega di declaracionnan di impuesto ta un parti importante pa loke ta trata e comportacion fiscal di un contribuyente. Durante e ultimo an?anan e cumplimento ta fluctua y a keda den su mayoria bou di 80%. Departamento di Impuesto ta subraya cu e cumplimento pa cu entregamento di declaracion di inkomstenbelasting y winstbelasting mester mehora. Por ripara cu e cumplimento riba tereno di winstbelasting a cuminsa disminui gradualmente y ta un desaroyo preocupante pa Departamento di Impuesto. Cumplimento pa cu entregamento di declaracionnan mensual ta bayendo den bon direccion y por mehora aun mas.

 Aki ta sigui un bista di e “compliance” pa loke ta declaracionnan di impuesto cu a wordo entrega y e esfuerso pa mehoracion riba e tereno aki 

SIN DECLARACION< TA PAGA MAS

 Keda sin haci declaracion ta nifica cu Inspector di impuesto lo impone un cobransa taxativo basa riba un calculacion. Alabes e cobransa lo inclui un boet pa incumplimento. Esaki ta nifica cu e contribuyente tin cu paga mas hopi na impuesto locual por causa cu e ta cay den un situacion financiero dificil y inespera.

 TRAHANDO PA MEHORA “COMPLIANCE”

 Departamento di Impuesto ta trahando constantemente pa mehora e compliance pa esaki por yega rond di 80% of 90%. E departamento no solamente ta keda informa e contribuyentenan di nan derecho- y debernan fiscal pero ta actua tambe na momento cu e contribuyente no ta haci caso di e notificacionnan menciona.

Conscientisacion pa cu cumplimento cu debernan di impuesto ta forma un parti esencial di e plan di comunicacion di Departamento di Impuesto pero tambe ta e responsabilidad di empresanan di contabilidad, abogadonan fiscal y tambe representantenan di comercio caminda cu ta enfatisa cu cada contribuyente mester ta consciente di e responsabilidad serio aki. Keda sin entrega un declaracion di impuesto y haci e pago concerni no ta un opcion mirando cu esaki ta castigabel pa ley.

Departamento di Impuesto kier duna mas transparencia den e trabaonan riba tereno di compliance, kier hala atencion di esnan cu no ta cumpliendo debidamente y ta gradici den e mesun rosea e contribuyentenan cu si a cumpli debidamente cu nan deber di entrega nan declaracionnan di impuesto. E grupo aki a demostra e consciencia y importancia di asumi nan responsabilidad.

Paso na final “Cumpli cu impuesto ta cumpli cu bo pais.”

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.