fbpx
December 06, 2022

Abogado na hues: “Mi cliente no por dera tur e mortonan di OM”

Share on Facebook
Share on Whatsapp
0
0
Abogado na hues: “Mi cliente no por dera tur e mortonan di OM”
Abogado na hues: “Mi cliente no por dera tur e mortonan di OM”


Esaki ta loke cu abogado mr. Hart a bisa diahuebs den corte. A acusa su cliente di a malversa placa como ambtenaar den e periodo di januari 2017 pa december 2021. Ta papia di un suma di 4400 florin. Si esey no keda proba, ta acus’e di malversacion siendo den servicio di Ministerio Publico. E di dos acusacion contra dje ta falsificacion di documento.

Marlyn Gomes nunca antes a hay’e envolvi cu husticia y tin casi 25 aña di servicio na Ministerio Publico. Cu e caso aki e ta core riesgo di perde su trabou.

Tur cos a cuminsa ora cu algun conoci di dje a pidie haci nan un fabor y e investigacion a cuminsa ora cu a descubri un fout cu el a comete den e sistema pa haci comosifuera e hendenan a paga.

Personanan cu tabatin debe di boet y cu tabata sa e ta traha na Ministerio Publico, a pidie pa paga pa nan. Tin di nan ta personanan cu kier a haci areglo. Ta papia aki di 6 persona y OM ta bisa cu e suma cu ta papia di dje ta 4800 florin. Sinembargo tanto e acusado como su abogado ta nenga esaki.

Segun Gomes, solamente seis persona, cu e conocenan personalmente, a dun’e placa pa paga boet. E otronan e no ni conoce nan. E mes, aunke su conocemento ta hopi basico, a dicidi di drenta den e sistema pa haci e cambionan. Y e no a hacie manera mester ta. Sinembargo asina mes a tarda basta pa Ministerio Publico descubri esaki. Un persona a bin nota cu tin un boet cu ta data di 2013 y e ta paga online na aña 2020. Pero esaki no por t’asina. Ta eynan a hala atencion di e controladonan. A bin descubri cu e persona aki nunca a haci pago di su boet. E tabata un di e hendenan cu a duna e acusado aki placa.  Asina e caso a cuminsa lora.

Den e dossier ta para cu na aña 2018 e señora a gana un miyon cu Lotto pa Deporte. E no a keda cu nada di e placa aki den un aña di tempo. El a paga su debenan, a cumpra un auto y a construi su cas. Pero despues el a bolbe cuminsa crea debe, ya cu su pareha no tabata traha. “Mi a tuma e placa pasobra e tempo ey mi casa  no tabata traha,” el a declara.

Loke si e ta desmenti ta cu el a traha recibo di pago pa esunnan cu a dun’e placa di boet. Solamente den e sistema el a traha di haci e cambionan necesario.

Hues a lesa un lista di nomber di esunnan cu a bisa cu a yega di paga boet pero a resulta cu nan cuenta ta habri ainda. Tabatin algun cu e acusado a bisa cu e no conoce nan mes. 

Durante tratamento di e caso a resalta cu e acusado ta geschors for di momento cu e caso a cuminsa lora. El a pasa cinco dia den detencion preventivo. El a conta Hues cu a pesar cu no a kit’e ainda for di trabou, e sa cu esey lo sosode pa cual el a cuminsa busca trabou. Pero niun caminda por a haya trabou.

A bisa e acusado cu aki ta trata di un echo hopi serio y el a haci mal uzo di su funcion como trahado di Ministerio Publico. Teniendo cuenta cu esaki a pidi un castigo di 240 ora di trabou pa comunidad of 120 dia cera; un castigo di 3 luna condicional y tres aña di prueba.

Su abogado mr. Hart a splica Corte cu loke su cliente a haci ta malo. Sinembargo e ta bisa cu e prome acusacion no por wordo proba. Simplemente pasobra e placa no a yega den caha di OM. E placa nunca tabata bou dje como ambtenaar. El a hay’e for di hendenan cu e conoce pa bay OM y haci e pagonan. E no a sosode momento cu e tabata traha.  Ademas, un di e biahanan, hasta ta su casa a ricibi e placa pa entrega na dje.

Tampoco e acusacionnan subsidiario por wordo comproba. No por papia di fraude, pasobra niun momento el a pusha of convence e hendenan pa entrega placa na dje. Ta e personanan a aserc’e.

E di dos acusacion tampoco por wordo proba. No por bisa cu el a traha un recibo falso den nomber di OM. E unico cos cu el a haci ta un cambio den e sistema.

Abogado Hart a cuestiona con kier tira mas caso riba lomba di su cliente. Tin hende cu a paga pero a resulta cu nan debe ainda. “Pero e hendenan ey mi cliente ni conoce nan. Mi cliente no por dera tur e mortonan di OM.” E otro hendenan su cliente no conoce mes, el a bisa. Pa colmo no a interoga nan pa puntra nan si conoce e acusado, el a bisa.

El a pidi pa tene cuenta cu su cliente a haya un castigo publico caba. Media a publica su potret y nomber. Banda di esaki, su doño di trabou tambe a saca un declaracion. No a trata su cliente husto, pasobra tabatin un otro caso di un ambtenaar y e no a haya un castigo publico y tampoco a saca un comunicado pa splica.

Hues a cera tratamento di e caso y dia 29 di september lo dicta sentencia.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.