fbpx
December 08, 2022

Miguel Mansur (ACCION21) Cero confiansa cu Gobierno di Aruba lo cumpli cu e recomendacionnan di Cft

Share on Facebook
Share on Whatsapp
0
0
Miguel Mansur (ACCION21) Cero confiansa cu Gobierno di Aruba lo cumpli cu e recomendacionnan di Cft
Miguel Mansur (ACCION21) Cero confiansa cu Gobierno di Aruba lo cumpli cu e recomendacionnan di Cft


Diabierna na Hulanda a tuma luga Rijksministerraad, unda cu ainda no a trata aanwijzing cu tin riba mesa pa Aruba. Secretario di Estado, Alexandra van Huffelen, a indica cu nan lo trat’e dia 21 di october. Lider di fraccion ACCION21 ta kere cu Aruba lo haya un aanwijzing, mirando cu gobierno no kier sigui e recomendacionnan di Cft. Pero tambe tabatin e clausura di IPKO, unda a tuma cierto decision. E siguiente encuentro di IPKO lo ta otro aña na februari y ta tuma luga na Corsou.

Van Huffelen a bisa di tin pleno confiansa cu Aruba lo logra regla su finansas publico y ta tene conseho di Cft na serio. Miguel Mansur, lider di fraccion ACCION21, ta kere cu Secretario di Estado lo ta hopi desapunta y e ta un bon diplomatico pa vocifera algo asina. E trayecto ta mustra desde presupuesto 2022, desde presentacion di presupuesto 2023, cu Aruba no tin ningun idea pa cumpli cu e recomendacionnan di Cft. Gobierno no a tuma ningun paso pa reforma pa por cumpli.

E parlamentario ta kere cu van Huffelen ta kere e ta bay ta sorprendi milagrosamente cu Gabinete Wever-Croes lo modifica presupuesto 2022 segun e recomendacionnan y punto di Cft, esey no ta bay pasa. Un di e cosnan cu Cft a trece dilanti ta cu nan kier mira e tres miyon di subsidio di Serlimar por ehempel kita fo’i misa. Esey efectivamente lo encera bancarota di Serlimar, segun Mansur. Esey no ta culpa di Cft, no ta culpa di Rijksministerraad, pero ta culpa di pais Aruba. Gobierno tin mas di un aña sinta y ta wardando riba resolucion pa Serlimar, ta wardando resolucion pa asina hopi tema importante pa Aruba. Loke ta Accion21 ta mira ta inaccion.

Mansur a indica cu su persona tin cero confiansa cu Gobierno di Aruba lo cumpli cu e recomendacionnan di Cft. Of Rijksministerraad ta bin cu aanwijzing na october pa presupuesto 2022 y manera cos ta bay nan lo mester haci esey pa presupuesto 2023. Esaki ta pasobra ta leu di e norma di LAFT, ta leu dje recomendacionnan di Cft. Mundo ta drentando den un recesion, interes ta subiendo. “Nos tin cuater biyon pa bay refinancia entre januari otro aña y 2027. Simplemente nos no ta bay logra refinancia na un interes cu nos por paga”, segun Mansur. “Nos ta bayendo straight pa faillissement”, el a sigui bisa.

E ta kere cu Reino ta compronde bon cla. Rijksministerraad sa specialmente cu e faillissement di Aruba por tin implicacion pa nan credit rating. Esey lo rekeri interaccion financiero directo riba Hulanda. E ta sigur pa purba evita e calamidad, e tragedia financiero ey, cu ta mas probabel cu un aanwijzing lo bini na october y probablemente uno despues riba presupuesto 2023 si Gabinete Wever-Croes no cambia di direccion.

CONCLUSION GRANDI RIBA IPKO

E conclusion mas grandi di Mansur riba IPKO, ta cu mester tin un miho siguimento di loke ta discuti y palabra. Un di e cosnan acorda di e proximo IPKO, ta cuminsa cu e afspraken lijst pa realmente duna siguimento. Un di e cosnan cu nan mester haci ta trece balor di nan participacion na IPKO y Parlatino pa pueblo di Aruba.

Mansur ta kere cu esey ta un stap den e direccion ey. Obviamente na Aruba nan tabatin cierto problema cu e delegacion. Pero nan mester ta hopi miho prepara, pa asina ey por papia cu un miho bos. No ta cuestion di trece punto di bista personal of partidista dilanti, pero ta cuestion di un standpunt comun como delegacion di Aruba. Ta di lamenta cu e biaha aki esey no tabata e caso.

Nan a acorda cu colonialismo y sclavitud un biaha mas lo ta riba agenda di IPKO. Esaki ta di dos biaha cu nan ta trat’e. Interesante tabata e ehempel cu e Hulandesnan a pone riba agenda y a trece e hendenan di Gemeente Rotterdam, realmente ta esunnan cu tin un plan caba cu nan ta duna 50 o 55 mil euro di asistencia na descendiente di sclavitud. Por ta esey ta un modelo cu nan por trat’e riba reino.

Un otro topico cu nan a trata tabata e deficit democratico y awo e ta un Regeerakkoord (acuerdo di coalicion) di gobierno Hulandes, tin mas chens cu por atende cu ne. Un di e cosnan cu Mansur a tende di Aruba despues di esey tabata e autonomia. Realidad ta atendiendo cu e deficiencia di democracia, ta duna mas contenido na autonomia. Aworaki por mira na nivel di Reino cu tin e parti ehecutivo cu ta Rijksministerraad y tin e minister plenipotenciario, unda tin e representacion di Aruba, Corsou y Sint Maarten. Den e parti legislativo di Reino, cu Staten defacto ta e parlamento di Reino, esta Eerste y Tweede Kamer, y eynan no tin representacion. E proposicionnan treci dilanti ta pa sigui duna contenido na e autonomia, sigui haya reconocemento como pais dentro di Reino n’e parti legislativo di Koninkrijk y Staten general.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.