fbpx
December 08, 2022

OPPA TA FELICITA Y GRADICI TUR ADULTO MAYO RIBA NAN DIA.

Share on Facebook
Share on Whatsapp
0
0
OPPA TA FELICITA Y GRADICI TUR ADULTO MAYO RIBA NAN DIA.
OPPA TA FELICITA Y GRADICI TUR ADULTO MAYO RIBA NAN DIA.

Awe ta un dia hopi special pa nos Grandinan.
Aweta 1 di october y nos ta celebra Dia Internacional di e Adulto Mayo.
Mundialmente embehecimento ta un reto pa e paisnan cu ta reconoce esaki.
Segun censo 2020, e poblacion di Aruba ta consisti di 106.766 habitante.
Den e 106.766 habitantenan aki tin mas of menos 22 mil Adulto Mayo.
Esey kiermen cu 21% di nos poblacion ta un persona grandi, un adulto mayo.

SVb ta señala cu segun ECLAC (United Nations Economic Commission for Latin American and the Caribbean) Aruba ya a yega den e fase 4 di embehecimento y ta den e top 5 di e paisnan Americano y Caribense cu e embehecimento di mas halto.
Esey kiermen cu e fenomeno aki ta rekeri urgentemente un atencion special for di e diferente instancianan social y mas ainda for di nos gobierno.

Den e bida diario di nos pais, ainda nos ta haya falta di e reconocemento pa e adulto mayo. Ta na su luga pa bisa cu den un pais civilisa y social manera Aruba ta hopi importante pa considera nos grandinan manera un ser humano socialmente activo, cu tin e necesidadnan diferente den e ciclo aki di nan bida. Nos mester visualisa e berdadero nificacion di e proceso di embehece cu ta bin cu su respectivo bentaha y desbentaha.

Awe mas cu nunca nos tin di bisa nos grandinan danki pa e dedicacion, experiencia, sabiduria y amor cu nan a brinda nos famia y e comunidad durante tur e añanan cu nan tabata labora.
Riba e dia special aki nos tur tin di gradici nan pa tur e añanan cu nan a lucha pa e derechonan cu nos tin awendia y cu nos por sigui goza di nan.
Nos grandinan tambe tin e derecho di biba den un mundo husto y yen di harmonia, brindando nan un bida yen di felicidad y beneficio.
Nos mester percura pa cumplicu e derechonan manera trato cu respet y dignidad, oportunidad real pa nan sigui participa y por keda activo riba e tereno economico social, segun nan forsa y deseo.
Nos tin di brinda nan e proteccion necesario na momento di crisis, scarsedad, soledad y enfermedad.

Awe ta e dia cu mas nos tin di honra y balora nos grandinan.

Na nomber di e directiva y tur e miembronan,
OPPA ta gradici y felicita tur Adulto Mayo riba nan dia.
Cu tur nos Grandinan pasa un dia yen di amor y alegria den compania di nan famia.

I. Valdes
presidente

ALGUN DI E DERECHONAN DI E ADULTO MAYO
01 Di tin un bida di calidad sin violencia y sin discriminacion;
02 Di ricibi un trato digno y apropia den cualkier procedimento hudicial;
03 Riba salud, alimentacion y famia;
04 Riba educacion;
05 Riba un trabou digno y bon paga;
06 Riba asistencia social;
07 Di asocia y participa den proceso productivo di educacion y capacitacion di bo comunidad;
08 Di denuncia tur echo, acto of negligencia cu ta viola e derechonan estableci den e ley di e Derechonan di e Adulto Mayo;
09 Riba un atencion amabel den establecimento publico y priva cu ta duna servicio publico;
10 Di conta cu asiento exclusivo den e servicio di transporte.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.