fbpx
November 28, 2022

Minister Arends ta laga ambientalista afo di su maneho

Share on Facebook
Share on Whatsapp
0
0
Minister Arends ta laga ambientalista afo di su maneho
Minister Arends ta laga ambientalista afo di su maneho


E siman aki Minister di Naturalesa, Ursell Arends a duna di conoce cu un compania Hulandes ta esun encarga pa delinea e proceso pa cu privatisacion di e planta di purificacion di awa sushi na balashi, esta RWZI. E informacion aki a hala atencion di defensor di medio ambiente, Milton Ponson, kende a reacciona cu palabra pisa den direccion di e maneho di Arends, como tambe esunnan cu Gabinete Wever-Croes ta confía pa conseha nan den loke ta trata asuntonan ambiental.

Ponson, di e NGO Rainbow Warriors Core Foundation miho conoci como Resilient Worlds International, a indica cu Minister Arends, di un forma directo, ta excluyendo dialogo cu stakeholders pa temanan ambiental y pa bin cu solucionnan cu ta primordial pa Aruba. “Desde cu el a sinta como minister nunca a sinta cu ambientalistanan hunto pa e cera conoci cu nan y pa mustra riba ki temanan e ta bay traha,” asina Ponson a comenta.

Adicionalmente a bisa na 24ora.com cu e titular di naturalesa tin poco consehero cu a conseh’e pa laga tur NGO afo. Di e manera aki, e decisionnan cu wordo tuma door cu gobierno, ta cuadra completamente cu deseonan politico y no e bienestar general. E instruccion lo tabata pa Milton Ponson y tur keda’fo pasobra nan ta bay stroba so.

Pa Ponson, dos autor principal cu ta cuasando e desconexion total cu e sector defensor di medio ambiente, ta hustamente Norman Kuiperi di fundacion Parke Nacional Aruba y mas ainda Greg Peterson, kende segun Ponson, “tur caminda ta hinca y ta conseha tres diferente minister con pa no worry cu NGOs; con pa laga nan afo den tur cos cu tin di haber cu medio ambiente y cu tambe ta toca e aspectonan di durabilidad, sostenibilidad y turismo na Aruba.”

E ambientalista a priminti di lo duna proximamente un splicacion mas amplio di su argumentonan. Durante e aña e fayonan na e rioolwaterzuiveringstallatie ubica na Bubali Plas a bira topico bisa di debate politico despues cu a keda comproba cu tanto holo como awa sushi ta afectando e area turístico di Eagle Beach.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.