fbpx
December 01, 2022

Grupo di apoyo di comunidad transgenero lo tene nan di dos reunion

Share on Facebook
Share on Whatsapp
0
0
Grupo di apoyo di comunidad transgenero lo tene nan di dos reunion
Grupo di apoyo di comunidad transgenero lo tene nan di dos reunion


Diaranson 22 november na HIAS Community Center riba L.G. Smith Blvd. 128 (banda di Wendy’s) cuminsando 7:30 pm lo tuma luga e segundo reunion di e grupo di apoyo pa comunidad transgenero, no binario y no-conformando.

Personanan transgenero ta esnan cu un identidad di genero diferente di loke a prescribi na nan na nacemento. Personanan cisgenero ta esnan cu un identidad di genero cu ta cuadra cu loke a prescribi na nan na ora di nan nacemento.

E comunidad transgenero, incluyendo esnan no-binario y no conformando por experiencia stress significativo nabegando un mundo cu ta trata ser cisgenero como e norma. Falta di conocemento di loke kiermen ta trans y maltrata personanan cu no ta cuadra dentro di e norma tin su efectonan negativo. Prescribi c’un genero robes por hiba na trauma psicologico, pero tin otro hende pa papia cu nan, cu por haci un diferencia grandi den bo capacidad pa enfrenta.

Mirando e necesidad pa un grupo di apoyo pa esnan trans na Aruba, diferente activista a uni pa brinda e espacio necesario aki. E grupo lo ta facilita door di psicologo Jermin Bell hunto cu activista trans Veer Alwani. E plataforma aki lo sirbi como un luga sigur(safe space) caminda participantenan por comparti nan experiencianan. Bell ta spera di sigui sondea y compronde kico e necesidadnan di e comunidad ta y con por brinda miho sosten psicosocial. Alwani, un homber trans, cu experiencia di participa den gruponan similar na Merca, conoce e beneficio di gruponan similar na otro pais y ta spera cu mas conscientisacion por yuda crea un sociedad mas inclusivo.

Mientras Hulanda ta bezig ta debati un di e leynan di genero mas progresivo na mundo, aki na Aruba no tin caminda di cana pa esnan trans por actualisa nan documentonan oficial. Aunke ta posibel pa tur hende bay corte y legalmente cambia nan nomber, no tin posibilidad na Aruba pa cambia un persona su genero of opta pa ningun genero manera algun pais ta permiti y ta describie c’un X den e documentonan oficial.

E prome paso di trece tur esnan di comunidad trans hunto ya a tuma luga. Unda a habri e dialogo pa mira con por brinda sosten y tuma accion pa mehora bida di e comunidad. Awo ta importante pa keda consistente den brinda e espacio aki na e comunidad aki.

Esnan interesa por tuma contacto cu [email protected] pa mas informacion. Aunke no ta necesario, esnan cu ta desea por avisa di nan participacion na Veer su email pa asina yuda e organisadonan cu e preparacionnan.

Participacion na e evento ta completamente gratis, NO tin necesidad di registra (por simplemente presenta e anochi) y tanto presencia como loke keda discuti lo ta completamente confidencial.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.