fbpx
December 07, 2022

Minister Rocco Tjon a biaha pa Suisa pa atende reunion di husticia

Share on Facebook
Share on Whatsapp
0
0
Minister Rocco Tjon a biaha pa Suisa pa atende reunion di husticia
Minister Rocco Tjon a biaha pa Suisa pa atende reunion di husticia


Diabierna atardi a nota presencia di Minister Rocco Tjon na aeropuerto. E team investigativo di 24ora.com a señal’e ora el a yega aeropuerto den auto glas scur y ricibi pa personal di protocol di gobierno.

Via e sala VIP el a drenta aeropuerto y escolta dibiaha pa e avion di KLM rumbo pa Hulanda. E mandatario no a biaha su so, el a bay compaña cu su coordinado, Irina Croes, p’asina yud’e notula durante e reunionnan na Suisa. E reunion manera indica, ta tuma luga na Ginebra, Suisa. Mientras cu Minister Rocco Tjon no a publica nada di su biahe, su propio colega di Corsou, Minister Shalten Hato a manda un comunicado di prensa pa informa riba su biahe, pa cual Minister Tjon tabata para den banda riba potret.

Si no ta pa Hato, ainda pueblo di Aruba no ta na altura cu Minister Tjon a biaha pa trabou. Tin cu menciona si cu; mescos cu Tjon, Minister Hato tambe a biaha cu un personal di su oficina pa asistie den reunionnan na Suisa. Tanto Tjon como Hato a biaha algun siman atras pa India pa atende un conferencia di Interpol. Mientras cu Hato di Corsou si tabata informa su pueblo riba e biahe y hasta tabata graba su biahe y publica riba TikTok, na Aruba ainda pueblo ta pendiente pa ricibi informacion for di Minister Tjon riba e resultado di e conferencia y con Aruba a sali benificia.

Comunicado di Minister Shalten Hato:

Ayera e delegacion di Corsou encabesa pa Minister Hato a sali pa asina asisti na e Universal Periodic Review (UPR) di e Conseho di Derecho Humano di e organisacion di Nacionnan Uni (United Nations Human Rights Council). Alabes, como cu Aruba y Sint Maarten tambe lo ta representa door di nan minister di husticia, e tres paisnan (Corsou, Aruba y Sint Maarten) a dicidi di organisa un Reunion Hudicial Tripartiet na Ginebra mes.

E UPR ta un mecanismo di evaluacion di Nacionnan Uni cu ta tuma luga cada 4 aña. Durante e UPR e situacion di derecho humano di cada pais miembro di Nacionnan Uni lo keda evalua. E proceso di UPR di e conseho di derecho humano ta brinda tur pais e oportunidad pa presenta iniciativanan cu a tuma pa drecha e situacion di derecho humano den cada pais. Despues di e presentacion di cada pais, otro paisnan miembro por reacciona y por duna recomendacion unda nan ta mira espacio pa mehoracion.

Pa e UPR, cada pais mester entrega un rapport cu ta elabora riba su propio situacion di derecho humano. Como cu tin un limitacion pa e cantidad di topico cu por aborda den e rapport aki, cada pais mester scoge topiconan relevante y tambe ta importante pa indica progreso di implementacion di cada recomendacion cu a keda acepta durante e UPR anterior.

Riba dia 15 di november e revision di Reino Hulandes lo tuma luga na Ginebra den presencia di Minister di Asuntonan Interior y Relacionnan den Reino y Ministernan di Husticia di Corsou, Aruba y Sint Maarten. Prome cu participa na e UPR, Corsou, Aruba y Sint Maarten lo tene un reunion hudicial tripartiet na Ginebra riba nivel ministerial. Inicialmente e reunion aki mester a tuma luga na Sint Maarten na luna di october, pero esaki no a tuma luga mas pa motibonan fuera di alcance di cada pais.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.