fbpx
December 04, 2022

Parlamentario Alvin Molina (MEP): Haime Croes di DIP mester duna cuenta!

Share on Facebook
Share on Whatsapp
0
0
Parlamentario Alvin Molina (MEP): Haime Croes di DIP mester duna cuenta!
Parlamentario Alvin Molina (MEP): Haime Croes di DIP mester duna cuenta!


“Awo cu nos ta cambiando nos strategia nacional, buscando mas stabilidad economico, construyendo mas pilar pa carga nos comunidad, nos Departamento di Infrastructura ta indespensabel y mester funciona optimal. Lastimamente hopi proyecto, di agricultura, horeca, deporte, vivienda, ta stagna pa via di un mal servicio duna door di DIP. E causa di tur esaki a cuminsa hopi aña pasa. Den casonan andando den corte por compronde cu riba nivel politico, maneho y procesonan, varios cos a bay robes pa cu otorgamento di tereno na Aruba”, asina parlamentario di Fraccion di MEP den parlamento, Alvin Molina, a vocifera awe. Un declaracion pisa, pero e tin algun siman caba ta atendiendo e tema di DIP, sin cu Gobierno ta sali pa contradeci of hustifica e maneho cu tin eyden ultimamente.

No ta custumber cu un parlamentario ta sali ataca un hefe di departamento directamente, pasobra e ultimo no por defende su mes. Mayoria bes ta ataca y cuestiona e minister politicamente responsabel pa e departamento y laga e cuestiona e director. Pero den e caso aki, e politico responsabel pa maneho di Directie Infrastructuur en Planning (DIP) ta nos minister-president cu alabes ta lider di partido MEP. Ta comprendibel e ora cu e parlamentario ta scoge pa salta e ruta politico y bay directamente na e ambtenaar y cuestiona su capacidad di maneho seriamente.

Ing. Rigoberto Croes Phd, miho comoci como Haime, tin dos titulo. El a studia pa ingeniero na Hulanda y despues a logra su PhD den turismo. E titulo di PhD ta para pa “Doctor of Philosophy” ta un titulo comun na e nivel academico di mas halto. Prome di cuminsa traha como director di DIP, e tabata duna les na Instituto Pedagogico Arubano (IPA).
Haime Croes ta na cabes di DIP desde dia 1 di januari 2019.

Relaciona cu e echo cu na DIP terenonan no ta saliendo y ta sinti cu no ta procesando nada debi cu tin investigacion penal andando eyden, tin e parlamentario disgusta. “E mesun situacion aki tin trahadonan di DIP cu miedo pa nan haci nan trabou, cual tin su efecto riba e servicio cu nan ta desea di duna pueblo. Pa nan tambe un solucion mester bin pronto. Lastimamente ta nada inusual cu tin investigacion andando den departamentonan gubernamental. Nunca un diensthoofd a instrui su coleganan pa stop di brinda servicio na pueblo di Aruba. Cu ki derecho DIP ta paralisa ful nos pais di desaroya? Como director bo no tin e luho di sinta warda pa otro bin cu e solucion con pa scapa bo departamento, bo coleganan y e futuro di Aruba”, asina e parlamentario a skirbi den su relato di prensa.

Alvin Sigmar Charles Molina a studia na Colegio Arubano, a caba VWO y despues a bay Hulanda unda a studia na Nederlandse Politie Academie na Apeldoorn entre aña 1998 pa 2002. Den su carera el a ocupa varios puesto y a encabesa investigacionnan grandi, manera entre aña 2010 y 2012 ora e tabata lider di proyecto na Recherche Samenwerkings Team (RST). Di eynan el a asumi e puesto di Hefe di districto di San Nicolas entre aña 2012 y 2018. Desde 2018 e tabata na cabes di districto di Oranjestad, esun di mas ocupa di Cuerpo Policial Aruba. For di 2021 el a sali for di Cuerpo Policial y a asumi e funcion di miembro di Parlamento di Aruba, den fraccion di MEP.

Un bon ehempel, Minister di Finansa y Cultura a hereda un debe gigantesco, ningun entrada, deficit 1000 miyon florin. El a lora manga, organisa su team, a logra un surplus di 63 miyon florin! MinPres a duna cara tur dia na su pueblo, splicando cada paso cu e ta tumando, tur decision, hasta esunnan no popular, pa awe nos ta na caminda pa sali for di e crisis mas grandi den historia di Aruba. Den un funcion bo ta carga un responsabilidad pa bo trabou y bo ta wordo confia cu un sierto autoridad.

“Na final bo mester duna cuenta pa e resultadonan. Un funcionario cu un funcion asina clave pa Aruba por desaroya, no mag nenga pa funciona, no mag nenga di duna cuenta na su minister y mucho menos na parlamento. Pesey durante tratamento di presupuesto mi a haci un peticion na minister pa pone e funcionario aki funciona. Si esey no ta posibel, pone un hende cu si por carga e responsabilidad pa pueblo di Aruba”, di acuerdo cu Parlamentario Alvin Molina.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.