fbpx
December 08, 2022

Dedica landamento na su tanta: Deaxo Croes ta cla pa su reto

Share on Facebook
Share on Whatsapp
0
0
Dedica landamento na su tanta: Deaxo Croes ta cla pa su reto
Dedica landamento na su tanta: Deaxo Croes ta cla pa su reto


Faltando solamente algun dia pa duna inicio na Crossing for Prevention, mester bisa cu tur cos ta na su luga, principalmente e estado mental y fisico di Deaxo Croes. Deaxo ta landa diasabra awo, 19 di november 2022 for di Boneiro pa Corsou den un hazaña cu e meta di recauda fondo pa e fundacionnan cu ta traha riba prevencion di cancer.

Mientras cu e accion aki ta dedica na tur esunnan cu cancer a cobra nan bida, esunnan luchando na e momento aki y e sobrevivientenan; den un buelta di destino, el a caba di bira mas personal ainda pa Deaxo. Algun dia atras, su tanta Mayrin a caba di haya diagostico di cancer. Tras e noticia aki, inmediatamente Deaxo a coy ainda mas curashi y determinacion y a bisa cu ta dedica e hazaña di Crossing for Prevention na su tanta.

Adicionalmente, Deaxo a continua durante e ultimo simannan aki entrenando fuertemente tur dia y durante gran parti di dia, guia pa e conseho profesional di su ekipo cu ta inclui dokter y nutricionista. Mentalmente tambe Deaxo ta sintie cla pa enfrenta e reto aki y ta den un estado masha positivo, gradiciendo un y tur pa e sosten y reaccionnan positivo cu e ta ricibi di asina tanto hende.
Pa loke ta trata logistica, tur cos ta na su luga tambe, unda cu e henter e team a sali diaranson dia 16 di november for di Aruba rumbo pa Boneiro caminda Deaxo lo papia cu prensa pa yuda hiba e mensahe di importancia pa aporta na e causa. Varios ta e yate cu a sali for di Aruba cu kayak, landado, personal medico y tambe di produccion audiovisual pa capta tur detaye di e gran reto. E ekipo ta contento di por confirma cu, a pesar di e yobida di ultimo dianan, tur cos ta indica cu lo conta cu un bon situacion di tempo pa dia di e landamento.

Loke ta sumamente importante pa en berdad Crossing for Prevention bira un exito absoluto, ta pa e pueblonan di Aruba, Boneiro y Corsou aporta cu nan contribucion monetario. Manera ta conoci, esey ta posibel caba a traves di e website www.crossingforprevention.com como tambe a traves di e cuenta di banco individual di e fundacionnan CORESA (Aruba), Stichting Kanker Fonds (Bonaire) y Fundacion Prevenshon (Corsou).

Tur informacion necesario ta disponibel eynan, como tambe riba e cuenta di Facebook Crossing for Prevention. Tin un cantidad limita di flanel (jerseys) cu, a traves di su compra, tambe ta contribui na recauda fondo. Tur dia tin mas hende sufriendo door di cancer, ta imperativo pa nos tur contribui na alivia nan sufrimento y conscientisa riba prevencion.
Danki particular ta bay pa e patrocinado principal, esta Aruba Bank, Orco Bank y Gomez Coffie, como tambe partners Cas Bon, HBN Law & Tax, Kooyman, ASD, SunBum, Alimentá, BITE! Communications, CR38TE, ELITE Productions, FOCAL Media, ZEN Designs y Verbum Works.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.