fbpx
November 28, 2022

Mervin Wyatt-Ras (AVP): Gobierno a trata tur cos menos loke ta mas relevante

Share on Facebook
Share on Whatsapp
0
0
Mervin Wyatt-Ras (AVP): Gobierno a trata tur cos menos loke ta mas relevante
Mervin Wyatt-Ras (AVP): Gobierno a trata tur cos menos loke ta mas relevante


E presupuesto di 2023 no ta un presupuesto realistico, segun parlamentario Mervin Wyatt-Ras. E ta un presupuesto cu ni fraccion di AVP ni, fraccion di MAS y di Accion 21 protesta energicamente contra di e presupuesto aki pa motibo cu e presupuesto aki no tin e conseho di Raad van Advies pasobra den e presupuesto presenta tin e conseho, pero basa ariba introduccion di BTW, mientras cu awor gobierno lo introduci un BBO. 

Kiermen un diferencia hopi grandi di dia cu anochi cu gobierno na un forma no transparente kier pasa pueblo un fast ball y no ta permiti pa nos como parlamentario por haci nos trabou di controla gobierno. Door di duna informacion falso gobierno ta impedi parlamento pa por eherce su budgetrecht. Nos fraccion a pidi pa e presupuesto wordo “ingetrokken”, den un carta fecha 5 di september 2022, sinembargo gobierno no a cumpli cu esaki y na un dado momento nos a pidi hasta un reunion publico den un carta fecha 21 di september. E presidente di parlamento no a yama e reunion, loke ta mina nos derecho parlamentario. E presidente aki ta wanta man cu gobierno paso tur loke gobierno kier pa e haci e ta haci.

Na momento cu a cuminsa trata e presupuesto, nos fraccion, como acto di protesta, a bandona sala di parlamento pa mustra cu nos no ta di acuerdo cu e forma con e presupuesto ta wordo trata. Presidente di parlamento a bay den prensa y a yama esunnan cu a sali tras di lider di AVP, mr. Mike Eman pa carne. Wyatt-Ras ta puntra e presidente ta ken a keda tras e cabrito- y buriconan? Wyatt-Ras ta cuestiona e forma baho y mahos pues cu e presidente ta papia cu parlamentarionan. Un presidente di parlamento ta representa henter parlamento. Edgar Vrolijk mester siña su trabou. E mester sa awor cu no por haci expresion asina ey. Su tarea ta pa representa henter Staten. E no ta eynan y no ta paga pa representa su partido so y mucho menos pa representa su fraccion.

Por lo general durante henter e tratamento aki gobierno no tabata enfoca riba loke ta biba den nos pueblo. E dolor cu nos pueblo tin, e dolor cu nos ciudadanonan no por pone pan ariba mesa di nan famia, no tin empleo suficiente, nos hendenan no por paga nan debenan, no por paga huur di nan vivienda, no por paga pa nan medicina dor cu awor e gobierno aki a corta den e lista positivo di medicina. Costo di bida a bira asina halto cu nos hendenan echt no por mas. Tur e puntonan aki nos pueblo ta concentra riba dje no a haya atencion di gobierno. Mester mustra gobierno ariba loke e ta haci. Wyatt-Ras a trece dilanti cu nos fraccion a sinta den edificio di parlamento y no den sala. Gobierno y e parlamentarionan di e stempeldoos a bisa y a haci comosifuera nos no ta bin trabou locual no ta berdad ni relevantie. E miembronan di parlamento den coalicion, en bes cu nan ta cuestiona maneho di gobierno, nan ta cuestiona nos como oposicion, anto nan ta bisa nos a bin come sin traha. Esey no ta corecto tampoco. Nos no a come.

Den pasado tabatin miembro di parlamento y minister actual di finanzas mes y otro nan si tabata djis bin busca cuminda sin keda na parlamento, awor nan ta esunnan cu ta acusa otro hende.

Esaki ta e forma di trato di e diferente ministernan y hasta parlamentarionan di acusa y tira lodo riba nos como oposicion. Pa asina nan por keda bon, pero pueblo ta realisa cu e gobierno aki no ta para banda di pueblo. Na ultimo a bin tira den nos un nota di cambio y den e nota di cambio aki menciona cu ta bay tin aumento door di aumento di BBO lo haya 63 miyon florin, lo bay cobra BBO na frontera cual ta un verkapte BTW, ta bay cobra e pasaheronan diescinco dollar pa entrada. No ta cla si ta tur pasahero. Tur ta forma pa saca placa for di cartera di nos ciudadanonan, mientras e menta principal di gobierno mester ta mehora bienestar y aumenta placa den cartera di tur nos ciudadanonan. Nos ta mira cu loke gobierno ta haci ta contrario, esta cu ta duna cartera di su mes y di su friends and family, mientras ta corta den e hendenan cu ya caba no tin pan pa pone ariba nan mesa. Di e forma aki nos no por bay duna sosten na un presupuesto como tal y su nota di cambio. Con nos por bay duna sosten na un presupuesto asina cu ta corta den alma di nos pueblo, anto pa bo tende cu awor si nos tin un surplus y ta gaba cu esaki.

Gobierno, si bo tin asina hopi placa di surplus e ora por elimina cu nos hendenan tin cu paga pa nan medicina, elimina tur diferente impuesto cu ta aumentando. Esey gobierno mester haci y no papia bunita, show off cu tin surplus, sinembargo nos pueblo ta yora tur dia, pueblo ta na rudia, cuido medico mester mas atencion no ta hay’e, esunnan limitacion no ta haya atencion. Nos fraccion a presenta un presupuesto alternativo pa asina e mayornan di yiu cu un of otro limitacion por haya un yudansa. Nan mayornan tin cu paga e testnan, tin cu paga fysiotherapie, tin cu paga tur e materialnan pa cuida nan yiu di 0-16 aña of otro limitacion.

Nos a pidi esey na gobierno. Ni gobierno ni e parlamentarionan no a worry pa contesta nos. Un par di miembro di parlamento a cuminsa papia riba esaki, pero e no ta algo cu ta ser considera serio. Crisisplan, ainda nos ta warda riba evaluacion paso e meta principal di henter e plan di 36 miyon no a ser logra, esta di baha e wachtlijsten. Te ainda tin mucha tin cu warda largo pa ser atendi y ta ser manda di cashi pa muraya ora tin problema. E family Justice Centrer cu a menciona cu lo ser institui cu placa di crisisplan no a ser ehecuta na 2021 manera bisa, ni na februari 2022 ni na juli 2022 y awor na final di aña kisas no ta ser tuma luga. Papia bunita pero e pueblo den necesidad, humilde y cu limitacion no ta ser atendi cu ne manera debe ser.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.