fbpx
December 08, 2022

Si bo tende su palabra y kere den Dios lo bo ta sana

Share on Facebook
Share on Whatsapp
0
0
Si bo tende su palabra y kere den Dios lo bo ta sana
Si bo tende su palabra y kere den Dios lo bo ta sana


Ta bon pa nos tur recorda cu e palabra “incurabel” no ta mas grandi cu e poder di Dios. Pasobra esey ta palabra di hende of caminda ciencia medico no ta mira un salida pa un malesa, nan ta declara cu esey ta incurabel. Pero locual ta “incurabel” pa hende, nos Dios tin tur poder pa sana.

Nos no mester tin miedo di papia ora nos tin fe den Dios pasobra no tin nada cu ta imposibel pa Dios. Salmo 107:19+20 ta para skirbi: E ora ey nan a sclama na Señor den nan angustia y El a salba nan for di nan afliccionnan.

El a manda su palabra y a cura nan, y a libra nan for di nan destruccion nan. Jeremias 32:27 ta para skirbi: Mira Ami ta Señor e Dios di tur carni acaso tin algo cu ta mucho dificil pa Mi.
Hesus a cura tur tipo di malesa cu hende por a bini cu ne su dilanti y nunca Hesus a bisa esaki si ta incurabel, al contrario Hesus ta nos sanado.

E muhe cu problema di fluho di sanger pa 12 aña , a tende, a kere, a mishi cu e zom di bisti, y inmediatamente e bashamento di sanger a stop. Hesus a bis’e bo fe a sana bo (salba bo) (Marco 5:25-31).
Bartimeo un homber ciego a tende di Hesus, a yama riba e nomber di Hesus, Hesus a scuch’e y a manda yam’e y e a wordo sana (Marco 10:46-52).

Hairo su yiu tabata malo muriendo, e a bay cerca Hesus pidi Hesus pa bay su cas y Hesus a bay cas di Hairo y a sana su yiu (Marco 5:21-43).
E leproso a yega dilanti di Hesus, a buig y bisa Señor si bo kier bo por haci mi bira limpi. Hesus a rek su man y mishi cu e homber bisando Mi kier, Sea limpi, y mesora el a keda limpi di su lepra (Mateo 8:3).

Isaias capitulo 53:4+5 ta bisa: Siguramente E mes a carga nos enfermedadnan y a carga nos tristesa, toch nos mes a consider’E golpia, suta pa Dios y afligi.
Ma e tabata trapasa pa nos trangreshonnan, El a wordo golpia pa nos inikidadnan, e castigo cu a trece pas pa nos tabata riba dje y pa medio di su herida nos ta cura.

Pa medio di e splicacion aki nos mester compronde cu Cristo Hesus a tuma nos carganan, y nos enfermedadnan riba dje y si nos kere den dje nos lo ta sana.

Den Juan 11:40 Hesus a bisa Marta: Mi no a bisa bo cu si bo kere lo bo mira e gloria di Dios. Esey Hesus a bisa prome cu el a lanta Lazaro for di morto, pa demostra e soberania di Dios den tur cos. Hopi hende ta malo y ta pasando momento dificil. Pero nos t’ey pa curasha tur hende cu ta malo pasando den momento dificil, pa nan corda cu Dios hamas ta laga e husto desampara.

Den e palabra di Dios tin sanacion, tin liberacion, tin gracia y tin fabor di Dios, tin tur locual cu nos mester. Hende mester kere y acepta den nan curason cu pa Dios nada ta imposibel.
Mescos cu Hesus por a sana hopi enfermo E por sana abo tambe pasobra pa Dios no tin distincion di persona, y tur cos ta posibel pa esun cu ta kere.
Si bo tende e palabra di Dios y kere den Dios lo bo ta sana.

Pastoor Marcel Balootje

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.