fbpx
November 28, 2022

Boneiro sa bon kico nan kier haci como destinacion turistico

Share on Facebook
Share on Whatsapp
0
0
Boneiro sa bon kico nan kier haci como destino turismo
Boneiro sa bon kico nan kier haci como destino turismo


Mark Benson Denz a tene un entrevista amplio cu CEO di Tourism Corporation Bonaire (TCB) den cual por a conoce mas di kico ta e desaroyonan mas reciente den sector turistico na nos isla ruman, pero tambe kico por spera den futuro riba termino corto y largo.

Miles Mercera, kende ta esun pa ocupa e puesto mas halto den e organisacion, a papia riba kico tur a haci durante e pandemia, decisionnan clave cu a tuma como destino turistico y retonan cu tin nan dilanti.

Mescos cu Aruba, Boneiro ta raporta cu ta recuperando basta bon for di e efectonan di pandemia y tambe ta surpasando caba e expectativanan cu tabatin. Esaki naturalmente tin su efecto riba economia. A menciona cu ta varios e restaurant y nightclub cu a habri y hotelnan cu a probecha pa renoba camber, mescos cu areanan turistico. Hunto cu esey a bin varios cambio den e maneho di turismo. 

Un di nan ta e implementacion di One Call A Day pa barco crucero teniendo na cuenta cu e infrastructura di Boneiro no por carga mas cu un barco pa dia. Facilidad ta limita, transporte ta limita y na final di dia, e experiencia di e bishitante ta cu el a scoge Boneiro conscientemente pa relahacion y autenticidad.

Tambe tin un Ground Management cu cual ta evita di aglomera bishitante den cierto temporada, pero ta parti esaki durante henter aña. Boneiro kier inspira y educa e futuro biahero door di no midi su sector turistico basa riba cantidad di bishitante, pero riba calidad; y no solamente cuanto nan ta gasta, pero con consciente e ta di e norma y balor cu e isla tin.

Mercera: “Den e cuadro ey a lansa e Bonaire Bond Program caminda ta firma un acuerdo; un promesa cu e bishitante cu e ta respeta nos cultura, e ta respeta nos mundo bou di awa, e ta respeta nos medio ambiente.” Ta un set di regla pa cumpli sin kita e sensacion cu e ta bon bini. 

Den ultimo luna a lansa nan slogan y campaña nobo: “It’s in our nature” enfoca riba e naturalesa humano pero tambe medio ambiente. E obhetivo ta pa crecemento bay den balans cu bo cultura y medio ambiente paso fuera di un paraiso pa duik, Boneiro su recurso di mas grandi ta su hende.

Pa e relato completo, lesa edicion di TREMPAN

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.