fbpx
December 02, 2022

Di dos edicion di Powerade Offroad Triathlon ta cerca

Share on Facebook
Share on Whatsapp
0
0
Di dos edicion di Powerade Offroad Triathlon ta cerca
Di dos edicion di Powerade Offroad Triathlon ta cerca


Joe Koervermans, Jessica de Veer y Jerusho Fernandez a ofrece un conferencia di prensa den cual a comparti detaye di loke ta bay bira e di dos edicion di loke desde awo ta bay ta conoci como e Powerade Offroad Triathlon.

Programa pa dia 11 di december, e ta cuminsa pa 6’or y mey di mainta na De Palm Island cu e parti di landamento. Despues ta subi mountainbike pa core un trail. Aki por scoge entre un short distance of un long distance; ambos ta pasa door di e naturalesa, specificamente Parke Nacional Arikok. E di tres parti ta un careda di 5 of di 10 kilometer, tambe den e trails.

Por participa den categoría individual y no ta haci distincion entre hende homber y hende muhe. E ta general. Tambe tin un categoria di Relay cu por consisti di dos of tres participante. E ekipo mes ta determina ken ta haci cua di e tres actividadnan.

Koervermans a splica cu nan mes a traha e rutanan pa e actividad aki y cu nan ta basta intenso. Sin embargo a bisa tambe cu esey ta exactamente loke ta haci e reto mas interesante. E inscripcion ta habri caba y tin luga habri. Pa registra por bishita e website www.otra-aruba.com Riba Facebook tambe ta haya pagina di Otra Aruba cu detaye di e evento.

Den calidad di Marketing Coordinador di Coca-Cola na Tropical Bottling Company, Jessica de Veer a informa cu, despues di a haya un acercamento di parti di e organisadonan, e compania a considera cu lo ta un honor y orguyo pa forma parti di dje. “Nos ta sinti cu nos producto di Powerade ta un match perfecto pa un evento asina, invitando pueblo no solamente pa tuma parti di e evento aki, pero conoce e producto Powerade un tiki mas di cerca y su beneficio,” asina de Veer a expresa. Esaki ta e prome colaboracion y ta kere cu algo bunita lo sali afo di esaki.

Di su banda, Jerusho Fernandez a papia como un ex participante di e Powerade Offroad Triathlon, pero tambe di otro evento similar den exterior. Basa riba su experiencia e por bisa cu esaki ta un di e miho caredanan cu el a yega di haci door di e acercamento cu naturalesa bunita di nos isla. E landamento biniendo tera ta aproximadamente 700 meter pero ta duna bo un bon sensacion. Di eynan ta sigui pa otro parti nechi y bo ta yega te punta Noord y bin bek, semper compaña pa un paisahe cu poco ta wak regularmente.

Fernandez: “E ta pa tur hende por haci tambe paso bo tin un distancia cortico y un distancia mas largo y algo mas importante ta cu si bo ta pensa cu bo no ta cla pa haci tur tres hunto, pero si bo tin un bon friend cu ta landa, otro cu ta core bais, boso por traha un great team y tambe participa na e Offroad Triathlon di Powerade.”

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.