fbpx
November 29, 2022

Hendrik Tevreden (MEP): Oposicion ta ful desconecta cu loke ta pasa na trabou

Share on Facebook
Share on Whatsapp
0
0
Hendrik Tevreden (MEP): Oposicion ta ful desconecta cu loke ta pasa na trabou
Hendrik Tevreden (MEP): Oposicion ta ful desconecta cu loke ta pasa na trabou


Desde siman pasa dialuna Parlamento di Aruba a cuminsa trata e ley mas importante, esta e ley di Presupuesto di Pais Aruba pa aña 2023. Pa awor ta conoci caba cu e ley di presupuesto pa aña 2023 a cana su caminda conforme e proceso stipula den ley. E presupuesto a pasa Raad van Advies y tin prueba di tur e documentonan cu firma riba nan na Parlamento. 

STUNT POLITICO DI OPOSICION

Recapitulando, Eman di AVP a habri reunion siman pasa dialuna cu un punto di ordo bisando lo contrario. Eman a vocifera cu nan a entrega un carta y no a haya contesta siendo cu nan a ricibi un contesta. Den esey Mansur a lanta tene su man y bisa cu ley di BBO no a pasa CAft, siendo cu e ley di BBO ta bay wordo trata prome cu reces den Parlamento. Esaki ta mustra riba Mansur su desconexion completo cu loke ta pasando na trabou. Na final Gunn ta core drenta sala y literalmente ta bisa, ‘fraccion MAS ta bay di acuerdo cu loke Eman a bisa y ta segunda esey’. Un barbaridad total sin ningun base pa hustifica pa no atende cu tratamento di e ley mas importante den Parlamento. Pa bini bek riba e carta di Eman, Gobierno a contesta su carta shete dia despues, pa ta exacto dia 12 di september 2022 por medio di conseho di DWJZ. Adicionalmente den e Nader Rapport contestacion di Gobierno riba Raad van Advies y den e Nota naar Aanleiding van het Verslag contestacion di Gobierno riba e preguntanan manda por escrito door di Parlamento. Esaki ta nifica cu tur e puntonan di precupacion menciona den su carta a wordo contesta debidamente. 

OPOSICION A BAY DI ACUERDO CU AGENDA DI TRATAMENTO DI PRESUPUESTO 2023

Ta notabel cu e idea politico aki a sali di Mike Eman mes, pasobra e siman prome a yama un reunion di ‘Senioren Convent’. Den e reunion aki tur lider di fraccion ta sinta hunto cu presidente di parlamento y Griffier, pa asina stipula con lo bay atende cu e reunion di presupuesto. Durante e senioren convent aki ni MAS ni ACCION21 tawata tin algo contra e proceso, contra e ley y tampoco contra e reunion. Cu otro palabra nan tabata di acuerdo cu e tratamento ley di presupuesto pa e fechanan stipula y a bay akkoord cu e indeling di e dianan. Pero como cu Eman nunca ta atende e reunionnan ey, ta te dialuna mainta e a core strategia su idea di sali for di sala cu ne y pa colmo nan a sigui su tras sin pensa mas leu cu nan nanishi. 

GOBIERNO NO TIN OBLIGACION DI BOLBE PIDI CONSEHO NA CAFT

Den e peticion di oposicion, oposicion kier insinua cu Gobierno di Aruba ta obliga di pidi CAft conseho riba e concepto di ley di Presupuesto cu no a wordo entrega na Parlamento y ora ricibi e conseho aki Gobierno mester sigui esaki. Sinembargo, e insinuacion aki no ta corecto! E ley di LAft ta indica cu CAft por duna conseho riba un concepto di ley di presupuesto of concepto di ley di cambio di presupuesto, pero esaki a base di un peticion di Minister di Finansas. 

Si dado caso CAft duna su conseho no solitica (ongevraagd advies) riba e concepto di ley, tampoco ta nifica cu minister mester sigui e conseho aki (den su totalidad). Gobierno por entrega un concepto di ley na Parlamento di Aruba cu no ta conforme e conseho di CAft y tambe na unda e contenido ta diferencia (‘wijziging’) cu loke a wordo na entrega CAft. Ademas, CAft mes a confirma den un medio di prensa cu Gobierno no tin e obligacion legal pa bolbe pidi CAFt pa revisa e presupuesto. Pues manera mi a indica na inicio, e presupuesto a cana su caminda sin desvia y na un forma transparente, honesto y cumpliendo cu tur ley stipula.

MEP-RAIZ NO A ‘BULLDOZE’ E LEY DI PRESUPUESTO

Despues cu coalicion di oposicion a haci nan ‘stunt’ fracasa, nos por a wak den medionan social unda cu AVP ta insinua cu mirando cu nan no lo forma parti di tratamento di Prespuesto den forma di protesta cu MEP y RAIZ lo ‘bulldoze’ y core pasa e ley di Presupuesto di Pais Aruba 2023. Fraccion di MEP y RAIZ a haci riba 600 pregunta critico na direccion di Gobierno. Diahuebs siman nos a ricibi e nota di cambio na unda Gobierno di Aruba a presenta un presupuesto 2023 cu Afl. 63 miyon surplus y ta nifica cu a logra 1% surplus. Despues di 6 dia di reunion intensivo sin presencia di oposicion, finalmente e Presupuesto di Pais Aruba pa aña 2023 a wordo aproba diaranson cu 11 vota pro y 6 contra. 

MIKE CU CONTROL RIBA MAS Y ACCION21

Tawata bisto manera cu e partidonan nobo a actua durante e tratamento di Presupuesto cu nan a wordo guia pa AVP. El a cuminsa na momento di contesta durante e punto di ordo, unda por wak cu MAS y ACCION21 no a prepara y no a scrutiña nan documentonan. Nan no tawatin bista riba e ley di LAft y tampoco riba e contesta di gobierno por medio di DWJZ. Ta bisto cu nan a perde nan identidad por completo y a bay den e gara di manipulacion di AVP. Ta bisto cu Marisol cu a bandona e partido di AVP awe ta bek cu nan y Mansur cu a condena nan maneho desastroso financiero awe ta bou nan liderazgo. Locual a resta nos pa compronde di e stunt aki ta cu nos por confirma cu tin un partido nobo cu coalicion di oposicion a cera: Partido AVP+.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.