fbpx
November 30, 2022

Eric Illes: Pensionado a registra pa participa den un caso contra SVB Corsou

Share on Facebook
Share on Whatsapp
0
0
Eric Illes: Pensionado a registra pa participa den un caso contra SVB Corsou
Eric Illes: Pensionado a registra pa participa den un caso contra SVB Corsou


Un cantidad di 254 pensionado cu ta ricibi un pensioen di SVB Corsou, a registra pa participa den un caso contra SVB. Na 2017 pa medio di un ley, SVB Corsou a dicidi unilateralmente di kita 10 % for di e pensioen. Na mes momento a kita e gratificacion cu den e temponan aki den luna di December nan tabata ricibi. E pensionadonan ta considera e ley discriminatorio.

No tin ningun parlamentario cu por sali na defensa di e pensionado? No por lanta un comision di investigacion parlamentario na Corsou? Un solucion por ta pa declara e puntonan discriminatorio den e ley “no aplicabel”. Esaki ta urgente pasobra aworaki e porta ta hancho habri pa mas recorte. Uno, pasobra SVB no a logra e meta original. Y na di dos luga pasobra den e ley di iniciativa original ta 30% nan tabata kier a corta. Esunnan cu ta biba afo aworaki ta un proyectil facil. (lesa facil pa tira atraco riba dje). No mucho tempo pasa na Hulanda gobierno mester a bai cas despues di un rapport di un comision parlamentario. Nan a yama e rapport “ongekend onrecht”. Esaki dor di un continuo inhusticia despues di varios aña.  Cerca nos aki un grupo ta gana nan caso y haya nan derecho y otro grupo di mesun categoria ta keda exclui djis pasobra nan a haci uzo di nan libertad di escogencia di residencia.

Declara e puntonan discriminatorio den e ley no aplicabel ta yuda e pensionado inmensamente y lo ta un fabor grandi. E ta scapa e pensionado di mester cana un caminda largo di bay corte, cu tur gasto envolvi. Pa no papia mes di e tempo cu esaki ta tuma. Varios ta e pensionadonan cu ta teme cu pa ora nan haya nan derecho, ya nan no ta na bida mas. Pa tal motibo lo inclui den e apelacion, cu for di momento cu e caso cuminsa te na momento di veredicto, e pago cu e pensionado mester a ricibi y cu a keda retene for di 2017, dado caso e no ta na bida mas, esaki lo bay sea pa su herederonan of den un fondo di solidaridad cu un destino pa combati pobresa.

Esunnan cu tabata forma parti di e islanan di Antias tambe a haya e recorte y a protesta contra e inhusticia. Dia 21 di maart 2021 Corte Superior a dicidi cu SVB Corsou mester debolbe e recorte di 10 % y e gratificacion di december cu forsa retroactivo for di momento cu a cuminsa kita esaki. Pero den e veredicto esaki a conta solamente pa esunnan cu ta biba na e islanan BES y of St. Maarten. E motibo ta cu e ley a keda traha, cu meta pa economisa den e fondo di SVB y exclui esunnan cu no ta biba na Corsou of Antias di cinco. Pa bin na remarca di e pensioen completo:

1.  Bo mester tabata biba na Antias di cinco prome cu 2010

2.  Bo mester tabata biba na Antias di 5 riba dia 29 di juli 2016;

3.  Bo mester a keda biba riba un di e islanan Boneiro, St. Maarten, Saba of St. Eustatius.

Asina nan kier a exclui algun pensionado for di e fondo pa baha gasto. Pero Corte Superior a mustra SVB riba nan inhusticia. Lamentablemente pa motibo di e manera cu e ley ta hinca den otro esnan cu ta biba na Aruba, Surnam, Canada, Hulanda of cualkier otro parti di mundo a keda exclui. E ley no ta cumpli cu principionan di igualdad. E ta discriminatorio pasobra ta trata hende den forma desigual. Tur a paga e mesun prima y tin e mesun derecho. Si esunnan cu ta biba na Antias di cinco segun hues tin derecho riba e pago completo, igual mester conta pa esunnan cu no ta biba eynan. E ley ta inadecua y contra derechonan humano internacional. Tin un protocol internacional cu ta bisa cu no ta permiti pa discrimina otro. Cualkier hoben di seis aña por afirma esey.  Tempo cu e pensionado tabata paga prima a confronta caba varios aumento di prima. Nan a paga esaki. Pa awor corta den loke nan mester haya ta incomprendibel. Ta legalisa discriminacion contra tanto e Hulandes como e stranhero. No tanto contra e nacionalidad di hende sino contra e libertad di residencia.

Den nan conseho na gobierno di Corsou, Sociaal Economische Raad (SER) ta skirbi cu nan no por a conclui cu si e ley pa corta a base di principio di teritorio tabata en contra di e protocol cu ta papia di discriminacion. Pasobra e motivacion di e ley no tabata formula na drechi. Tampoco SER no por a formula un bon idea di e necesidad di e medida pa corta. E loke SVB kier a logra economisa lo a wordo carga dor di un parti chikito di pensionado cu ta esunnan cu no ta residencia na Corsou. Cu e veredicto di hues, e grupo for di cual ta ricibi e recorte a bira mas chikito ainda. Pues cu e ley, SVB sigur no a logra su meta.

Cu e ley ainda na vigor SVB un ora pa otro por bin kita 20, 30% for di e pensionado cu no ta biba na e Antias di cinco di antes. Cu e caso e pensionado kier :

1.  Reclama su derecho pa wordo trata husto i igual;

2.  Evita cu SVB ta bolbe uza e pensionado como obhetivo facil y bolbe bin kita mas %.

Si, e ta un atraco pasobra e recorte ta un ladronicia den dia cla.  Tin un dicho na Spaño ta bisa “los ladrones siempre buscan un objetivo facil”. Segun veredictonan internacional p.e. di Centrale Raad van Beroep di Hulanda, AOV ta cay bou di e termino “propiedad”.  Y no por kita propiedad asina sin mas for di hende. Es mas e ley no ta cumpli cu e principio di proporcionalidad. Segun SER e loke SVB a haci no lo a trece mucho cen den lachi. Pa e individuo  pensionado a cambio si, e loke a corta ta nifica hopi pe. Pa e por paga su remedinan caro, mantene un nivel di bida aceptabel, no cay den pobresa y ta participe den un seguridad social. E recorte no ta efectivo y  SER a conseha gobierno pa no aproba e medida aki. Gobierno no a sigui e conseho aki.

Te na momento cu kier a pidi e pensionado contribui como forma di solidaridad, por a haci esaki pa un periodo por ehempel di dos aña. E recorte no tin un termino fiho y e ta parce di ta definitivo. Di otro banda costo di bida ta sigui subi. Es mas no ta 10 % so SVB a kita. Na mes un momento pais Corsow a introduci  impuesto riba e pensioen di manera cu ta mas cu 20% e pensionado a perde. Aruba tambe a pasa momentonan dificil, pero su SVB si no a haci mescos cu esunnan cu ta haya SVB di Aruba y cu ta biba na Corsow. Aruba a respeta e derecho fundamental di libertad di residencia.  

Tambe por considera e e hecho aki no democratico. E pensionado ta biba afo y no por duna su desaprobacion cu su voto y duna di conoce cu e ta contra e inhusticia aki.

Ta haci un apelacion na parlamentarionan, gobierno y SVB di Corsou pa mustra grandesa y acepta cu aki a comete un eror y cu ta dispuesto na coregi esaki. Por declara e articulonan di e ley no aplicabel, duna e pensionado loke e tin derecho riba dje como un accion di gracia. Di e manera aki por alivia y  evita cu pensionadonan mester cana un caminda largo pa haya nan derecho.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.