fbpx
November 30, 2022

Di dos anochi di Caiso & Soca Monarch tabata yen di ambiente

Share on Facebook
Share on Whatsapp
0
0
Di dos anochi di Caiso & Soca Monarch tabata yen di ambiente
Di dos anochi di Caiso & Soca Monarch tabata yen di ambiente


Manera ta conoci caba, e pre-finalnan di Caiso & Soca Monarch pa Carnaval 2023, Carnaval 69, a conoce un cambio. 

Custumber ta cu tur aña esaki ta tuma luga meymey di luna di januari. Pero Stichting Musica p’e proximo temporada di Carnaval, e prome despues di dos aña, a dicidi di bin c’un cambio, algo innovativo. E pre-final di Caiso & Soca Monarch Contest ta tuma luga den luna di november, reparti den 3 anochi (tres weekend) tras di otro. 

Tambe cada anochi di semi-final lo ta dedica na un baluarte di musica aki na Aruba of un baluarte cu a haci hopi den e temporada di Carnaval di Aruba. 

E prome anochi a tuma luga na Dakota, cual anochi tabata dedica na Ruben “Scorpio/Tio” Garcia. Ruben tabata un gran baluarte di su bario stima Dakota y na mas di un ocasion tabata maestro di ceremonia den e festival. 

Diasabra anochi a tuma luga e di dos anochi (di dos weekend) di pre-final, cual a tuma luga na Centro di Bario Playa Pabou, cual tabata dedica na un baluarte di Companashi, Etty Toppenberg. 

Edwina Werleman, presidente di Stichting Musica, a indica di ta super satisfecho cu e publico cu a bin respalda y motivo, apoya tur e artistanan y tambe e bandanan. Tabata un anochi yena di ambiente, for di comienso te fin. 

E siguiente presentacion lo ta dia 26 di november, na Centro di Bario Brazil. 

Mas aleu, Werleman a bisa di ta contento di wak tur e bandanan cu a presenta, cu a sa di, den un temporada halto, a sa di mustra cu nan por traha un produccion p’asina presenta den un competencia grandi manera cu e Caiso & Soca Monarch Contest. 

Na nomber di e directiva di Stichting Musica completo, Edwina Werleman a gradici tur e miembronan di prensa cu a haci un cobertura. Tambe na Stichting Musica mes, pa por a traha asina duro pa asina e Caiso & Soca Monarch por tabata un realidad. 

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.