fbpx
November 29, 2022

FIFA a invita Richard Dijkhoff di CFU : Aruba bon representa na Qatar durante apertura di World Cup 2022 

Share on Facebook
Share on Whatsapp
0
0
FIFA a invita Richard Dijkhoff di CFU : Aruba bon representa na Qatar durante apertura di World Cup 2022 
FIFA a invita Richard Dijkhoff di CFU : Aruba bon representa na Qatar durante apertura di World Cup 2022 


Despues di a ricibi un invitacion special di FIFA, e vice-presidente di Caribbean Football Union (CFU), ing. Richard Dijkhoff diasabra ultimo tabata invitado na e celebracion di apertura di e “FIFA World Cup Qatar 2022”. E ceremonia a tuna luga na FIFA Fan Festival Hospitality na Al Bidda Park na Qatar. E opening celebration aki tabata un espectaculo nunca bisto. Den un forma unico Qatar a yama bonbini oficialmente na e World Cup 2022. 

Despues di a celebra e apertura, diadomingo Richard Dijkhoff tabatin e honor di a presencia e ceremonia di apertura di e Copa Mundial 2022 na stadion Al Bayt na Qatar. Aki e pais cu ta host e torneo a percura pa un tremendo show pa inaugura e Copa Mundial di Futbol pa aña 2022. 

Despues di un tremendo show a sigui e wega di e pais anfitrion Qatar contra di Ecuador. Den un stadion repleto cu fanaticonan di ambos pais y demas invitadonan, e ekipo di Ecuador a vence e seleccion di Qatar 2-0. Impresionante tabata e reaccion di e publico den stadion despues cu HH Sheikh Tamim bin Hamad Al Thani a duna su discurso y a duna inicio na e torneo mundial aki. 

Durante su estadia, ing. Richard Dijkhoff a tene diferente reunion cu diferente ehecutivo di FIFA y dirigentenan di varios federacion y a intercambia di ideanan y di experiencia pa asina e por duna un miho contribucion na desaroyo d e deporte futbol den Caribe. 

Como vice-presidente di CFU, ing. Richard Dijkhoff tin un tarea hopi importante pa cu e otro miembronan ehecutivo, manera e mester yuda maneha, dirigi y administra e organisacion internacional di futbol den Caribe na bienestar di su 31 federacionnan. 

Tabata dianan intensivo pero alabes impresionante y educativo pa asina e por sigui desaroya y gana mas experiencia y conocemento. Awo ta keda un wega mas pa bishita cual lo ta e wega entre Senegal contra Hulanda diamars awor na Al Thumama Stadium na Qatar.

TOCANTE ING. RICHARD DIJKHOFF

Un biaha mas ing. Richard Dijkhoff ta representa nos isla internacionalmente, cu ta haci nos masha orguyoso. El a sirbi pa dos termino sigui den e funcion di presidente di Arubaanse Voetbal Aruba (AVB), a cera un netwerk di contacto grandi y prominente den henter nos region. Separa di esey a logra cambionan drastico den desaroyo y innovacion di futbol, pa cual Caribbean Football Union y CONCACAF ta sigui haci uzo di su experiencia y experticio pa yuda otro islanan den nos region. Na CONCACAF el a cera un amistad estrecho cu e presidente di e federacion, mescos cu e secretario general. Ambos ta kere totalmente den su conocemento y ta haci bon uzo di e “storia di exito di Aruba” pa logra cambio den otro mercadonan tambe. Pa dos termino caba e ta ocupa e funcion di vice-presidente di CFU.

TOCANTE FIFA

A funda FIFA dia 21 di mei 1904 y ta e organisacion na cabes di e deporte di futbol, futsal y beach soccer. E ta responsabel pa organisa torneonan internacional, manera e Copa Mundial, cu a cuminsa desde aña 1930 y e Copa Mundial Femenino cu a start na 1991. Mester menciona cu ora a funda FIFA na 1904 tabata pa supervisa e competencianan internacional entre a asociacionnan nacional di Belgica, Dinamarca, Francia, Hulanda, Spaña, Suecia y Suisa. Su oficina principal ta na Zürich y awendia ta conta cu 221 miembro di asociacionnan nacional. Tur miembro di FIFA mester ta miembro tambe di un di e 6 confederacionnan regional, den cual a parti mundo. Nan ta Africa (CAF), Asia (AFC), Europa (UEFA), Norte-Centro America y Caribe (CONCACAF), Oceania (OFC) y Sur America (CONMEBOL).

TOCANTE CFU

Caribbean Football Union (CFU) ta e organisacion representante dje asociacionnan di futbol den Caribe. E ta representa 25 nacion miembro di FIFA, como tambe 6 teritorio no afilia na FIFA. A establece e Union na januari 1978 y su Asociacion Miembro ta competi den region di CONCACAF. Tambe CFU ta atende cu competencia den desaroyo, inclui ‘Challenge Series’ femenino, mucha homber y mucha muhe.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.