fbpx
November 29, 2022

Pastoor Marcel Balootje: Ta dificil bisa cu nos ta stima Dios y no ta stima hende

Share on Facebook
Share on Whatsapp
0
0
Pastoor Marcel Balootje: Ta dificil bisa cu nos ta stima Dios y no ta stima hende
Pastoor Marcel Balootje: Ta dificil bisa cu nos ta stima Dios y no ta stima hende


Nos ta stima, pasobra El a stima nos prome. Si un hende bisa “Mi ta stima Dios, y ta odia su ruman”, e ta un gañado, pasobra esun cu no ta stima su ruman cu el a mira, no por stima Dios, kende e no a mira. Y e mandamento aki nos tin di dj’E cu esun cu stima Dios mester stima su ruman tambe (1 Juan 4:19-23).

Ken cu ta odia su ruman ta un matado y boso sa cu ningun matado. No tin bida eterno ta permanece den dje. Na esaki nos conoce amor y nos mester entrega nos bida pa nos rumannan (1Juan 4:15-16).

Ma ken cu tin e biennan di mundo y ta mira su ruman den necesidad, y ta cera su curason p’e, ta con e amor di Dios ta permanece den dje? (1 Juan 4:17).

Pa motibo di materialismo y falta di temor di Dios, hende su curason a cera pa otro. Hende ta wak nan propio interes y no ta preocupa cu interes di otro. E falta di respet di un pa otro, respet pa bida di otro, respet pa famia di otro, respet pa matrimonio y respet pa hogar di otro a yega na un nivel hopi abao. Ta parce manera hende no kier biba mas cu otro.

Cada biaha cu nos trata di hiba e evangelio di e Reino di Dios pa un hende, esey no ta sosode pa motibo di religion. Pero esey mester sosode pa motibo di amor, pasobra nos tur mester corda cu Dios a stima e mundo aki asina tanto cu El a manda su Yiu unigenito pa ken cu kere den dj’E no bay perdi ma haya bida eterna.

Dios ta stima tur hende riba mundo, hasta esunnan cu ta rechasa Dios pa motibo di orguyo, inmoralidad, incredulidad y duresa di curason. Pero locual ta sosode ta cu Dios no por stima nan pica, pasobra pica ta separa hende for di Dios.

Dios ta amor, ta luz y den dj’E no tin nada nada di scuridad, p’esey nos mester permanece den e luz cual ta Cristo Hesus.

Asina cu nos cuminsa tene amistad of laga e mundo domina nos, sea pa placa, deseo di poder of grandesa, nos ta aparta for di Dios. Pasobra ta para skirbi cu amistad cu mundo ta enemistad cu Dios.

Pasobra tur esunnan cu ta guia pa e Spirito di Dios, esakinan ta e yiunan di Dios (Romanonan 8:14). Djis tene na cuenta ora hende ta trata otro malo y sa cu e spirito ey no ta di Dios.

Awendia mundo a drenta den un sistema hororoso caminda bida no ta respeta. Hasta bida di mucha no ta conta, pasobra nos tur por mira con halto e nivel di abortus ta subiendo na mundo. Y dia pa dia tur caminda ta aprob’e.

Teniendo multiple forma pa evita un embaraso, hende educa ta prefera sali na estado y bay haci aborto. Aki nos ta mira e palabra di Dios ta cumpli cu e amor di hopi lo fria.

Pasobra inikidad lo aumenta y nos tur ta experiencia esey awor aki, caminda balor di bida di hende no ta conta mas. P’esey e palabra di Dios ta bisa nos cu esun cu persevera te na final, esey lo ta salba.

Laga nos para hunto como un famia, haci oracion y biba pa Señor, pasobra e binida di Cristo Hesus ta cerca. Cristo Hesus ta e unico caminda di berdad y e bida, e unico opcion pa nos salbacion.

Share on Facebook
Share on Whatsapp
0
0

Meta di 1Noticia ta pa duna pueblo un bista amplio di noticia na Aruba. Sinembargo nos no ta doño di contendio di e articulonan cu ta aparece riba nos plataforma.